अमेरिकामा विमान दुर्घटना : नदीमा भेटियो १९ जनाको शव

काठमाडौं । अमेरिकाको वासिङ्टन डिसी नजिकै अमेरिकी एयरलाइन्सको विमान अमेरिकी सेनाको ‘ब्ल्याक हक’ हेलिकप्टरसँग ठोक्किएर दुर्घटना हुँदा मृत्यु हुनेको संख्या १९ पुगेको छ ।

विमानमा ६० जना यात्रु र चार जना चालक दलका सदस्यसहित ६४ जना सवार थिए । हेलिकप्टरमा तीन जना सैनिक थिए । आकाशै ठोक्किएर जहाज र हेलिकप्टर नदीमा खसेका थियो । नदीबाट उद्दारकर्ताले १९ जनाको शव निकालेका हुन् । अन्य बेपत्ता छन् ।

Advertisement

बम्बार्डियर कम्पनीको सीआरजे ७०० विमान विचिटा क्यानकासबाट वासिङ्टनतर्फ जाँदै थियो । अमेरिकी सञ्चारमाध्यमका अनुसार विमान दुर्घटनापछि हावामा दुई भाग भई पोटोम्याक नदीमा खसेको थियो ।

नदीमा खोजी तथा उद्धार कार्य जारी छ । स्थानीय समय अनुसार राति ९ बजे वासिङ्टन रेगन नेसनल एयरपोर्ट नजिकै दुर्घटना भएको थियो ।

रेगन एयरपोर्टले सामाजिक सञ्जाल एक्समा एक सूचना जारी गर्दै लेखेको छ,’तत्कालका लागि सबै उडान स्थगित गरिएको छ ।’

अमेरिकी सैनिक अधिकारीले अमेरिकी समाचार च्यानल सीबीएसलाई बताएअनुसार दुर्घटनामा परेको हेलिकप्टर अमेरिकी सेनाको ब्ल्याक हक हेलिकप्टर थियो । हेलिकप्टरमा अमेरिकी सेनाका तीन सैनिक सवार थिए ।

अमेरिकी राष्ट्रपति डोनाल्ड ट्रम्पले दुर्घटनापछि सामाजिक सञ्जाल एक्समा सन्देश जारी गर्दै दुःख व्यक्त गरेका छन् ।