विमान दुर्घटना : कोही पनि जीवित भेटिएनन्, ६७ जनाकै मृत्युको आशंका

एजेन्सी । अमेरिकाको राजधानी वासिङ्टन डिसीमा रेगन नेसनल एयरपोर्टनजिकै अमेरिकी एयरलाइन्सको विमान र सेनाको ब्ल्याक हक हेलिकप्टर ठोक्किएर दुर्घटनामा परेकाहरु हालसम्म जीवित भेटिएका छैनन् ।

बिचिटा क्यानकासबाट वासिङ्टनतर्फ जाँदै गरेको जहाज र सेनाको हेलिकोप्टर ठोक्किँदा बुधबार राति दुर्घटना भएको थियो । जहाजमा चालक दलका ४ सदस्यसहित ६४ जना र हेलिकप्टरमा ३ जना अमेरिकी सैनिक सवार थिए ।

Advertisement

विभिन्न सञ्चारमाध्यमका अनुसार हालसम्म ४० जनाभन्दा बढीको शव फेला परिसकेको छ । जहाजको फ्लाइट डाटा रेकर्डर (ब्ल्याक बक्स) पनि फेला परेको छ । बीबीसका अनुसार हालसम्म कोही पनि जीवित फेला नपरेका कारण सबै जना (६७ जना)कै मृत्यु भइसकेको आशंका गरिएको छ ।

दुर्घटना भएको दृश्यलाई केही क्यामेराले कैदसमेत गर्न भ्याएका थिए। जसमा विमानस्थलमा हवाईजहाज अवतरण गर्ने तयारीमा रहेको र हेलिकोप्टरसँग ठोक्किएको देखिन्छ ।

दुर्घटना भएपछि विमानका २ वटा टुक्रा पोटोम्याक नदीमा खसेको प्रत्यक्षदर्शीले बताएका छन्। दुर्घटनाग्रस्त विमानमा रहेका यात्रुको खोजी भइरहेको अधिकारीहरुले जनाएका छन् । तेज हावा, चिसो मौसम र धमिलो पानीका कारण उद्धारमा कठिनाइ भइरहेको छ।

दुर्घटनापछि रेगन एयरपोर्टले तत्कालका लागि सबै उडान स्थगित गरेको छ । अमेरिकी राष्ट्रपति डोनाल्ड ट्रम्पले दुर्घटनापछि सामाजिक सञ्जाल एक्समा रेगन एयरपोर्टको दुर्घटनाका बारेमा जानकारी पाएको उल्लेख गरेका छन् । उनले दुर्घटनामा ज्यान गुमाएकाहरूप्रति दुःख व्यक्त गर्दै भनेका छन्, ‘मृतकका आत्मालाई भगवानले शान्ति प्रदान गरून्।’

अमेरिकामा यस किसिमको दुर्घटना निकै दुर्लभ मानिन्छ। यसअघि सन् २००९ मा यस्तै दुर्घटना भएको थियो । त्यो बेला न्युयोर्कको बफेलोमा विमान अवतरण हुँदा दुर्घटना भएर ५० जनाले ज्यान गुमाएका थिए।