शैलजा सञ्चालनका लागि गंगालालसँग सहकार्य

विराटनगर । विराटनगरमा रहेको शैलजा आचार्य हृदय रोग उपचार केन्द्र सञ्चालनका लागि गंगालाल हृदय रोग अस्पतालसँग सहकार्य गरिने भएको छ ।

कोशी प्रदेश सरकार मातहत रहेको तत्कालीन कोशी अस्पताल कोभिड-१९ उपचार केन्द्रमा स्थापना भएको शैलजा आचार्य हृदय रोग उपचार केन्द्र सञ्चालनका लागि गंगालाल हृदय रोग अस्पतालसँग सहकार्य गरिने भएको हो ।

बिहीबारदेखि स्वास्थ्य मन्त्रालयको जिम्मेवारी पाएका भौतिक पूर्वाधार विकासमन्त्री भूपेन्द्र राईले पदभार ग्रहण गर्दै शैलजा सञ्चालनका लागि गंगालालसँग सम्झौता गर्ने निर्णय गरेका हुन् । ‘संघीय स्वास्थ्यमन्त्री प्रदीप पौडेलज्यूसँग पनि कुरा गरेर शैलजा आचार्य हृदयरोग उपचार केन्द्रलाई सञ्चालनका लागि गंगालाल अस्पतालसँग सम्झौता गर्ने निर्णय भएको छ,’ मन्त्री राईले भने ।

कोभिड-१९ उपचार केन्द्रको संरचनामा शैलजा आचार्य हृदय रोग उपचार केन्द्र सञ्चालन गर्ने निर्णय तत्कालीन मुख्यमन्त्री केदार कार्कीले गरेका थिए ।  तर, वर्तमान मुख्यमन्त्री हिक्मतकुमार कार्कीकाे प्राथमिकतामा यो अस्पताल परेन । कांग्रेस-एमाले गठबन्धन सरकारमा स्वास्थ्य मन्त्रालय कांग्रेसले नै नेतृत्व गरेका कारण  अस्पताल सञ्चालनका लागि सम्झौता गर्ने निर्णय भएको हो ।