जापानीज इन्सेफ्लाइटिसका कारण विराट शिक्षणमा उपचाररत बालकको मृत्यु

विराटनगर । जापानीज इन्सेफ्लाइटिसकाे संक्रमणबाट मोरङको बूढीगंगास्थित विराट शिक्षण अस्पतालमा उपचाररत १ जना बालकको मृत्यु भएको छ ।

उदयपुरको त्रियुगा नगरपालिका–३ घर भएका ११ वर्षीय अनमोल राईको मृत्यु भएको अस्पतालका प्रशासन प्रमुख प्रमेशराज देवकोटाले जानकारी दिए । उनका अनुसार करिब डेढ महिना अघिदेखि उपरचाररत बालकको सोमबार बिहानका राति मृत्यु भएको हो ।

कक्षा ५ मा अध्ययनरत बालकलाई ३ महिना अघिदेखि ज्वरो आउने, टाउको दुख्ने, वान्ता र बेहोस हुनेलगायतका समस्या देखा परेको थियो । उपचारका क्रममा परीक्षण गराउँदा उनलाई जापानीज इन्सेफ्लाइटिस पुष्टि भएको हो ।

सेतो प्रजातिको भनेर चिनिने क्यूलेस जातको लामखुट्टेको टोकाइबाट यो रोग लाग्छ । उपचारमा संलग्न चिकित्सकले बालकलाई करिब ३ महिनाअघि लामखुट्टेले टोकेको हुनसक्ने बताए । ‘उपचारमा कुनै कमी हुन दिइएको थिएन । तर, बचाउन सकिएन । मस्तिष्कभित्रको नशाको पानी सुकेपछि संक्रमित बालकको मृत्यु भयो,’ देवकोटाले भने ।

उनका अनुसार उदयपुरकै बेलका घर भएका अर्का १४ वर्षीय बालकको पनि भेन्टिलेटरमा उपचार भइरहेको छ । जापानीज इन्सेफ्लाइटिस पुष्टि भएका बालकको २ महिनादेखि उपचार भइरहेको जानकारी देवकोटाले दिए ।

के हो जापानीज इन्सेफ्लाइटिस ?

मानिसको मस्तिष्कमा संक्रमण हुने लामखुट्टेको टोकाइबाट सर्ने गम्भीर रोग जापानीज इन्सेफ्लाइटिस हो । संक्रमित सुँगुरलगायतका जनावरलाई टोकेको लामखुट्टेले मानिसलाई पनि टोकेपछि यो सर्छ । विश्वमा हरेक वर्ष ५० हजारभन्दा बढीलाई संक्रमण हुने गरेको विभिन्न तथ्यांकले देखाउँछ ।

तथ्यांक अनुसार संक्रमितमध्ये विश्वमा बर्सेनि १० देखि १५ हजारको मृत्यु हुने गरेको छ । नेपालमा समेत पछिल्लो समय यसको संक्रमणबाट मृत्यु हुनेको संख्या बढ्दै गइरहेको छ । गत वर्ष १ सय ७ जना संक्रमित हुँदा ७ जनाको मृत्यु भएको थियो ।

यो वर्ष मनसुन सुरु भएयता भदौसम्ममा १४ जना संक्रमितको मृत्यु भइसकेको छ । ६५ जना संक्रमित भइसकेका छन् ।

नेपालमा धेरैजसो जापानिज इन्सेफलाइटिसविरुद्धको खोप नलगाएकाहरु प्रभावित भएको देखिन्छ । यो रोग लागिसकेपछि निको नहुने र लागेकामध्ये ३० प्रतिशतको मृत्यु हुने जोखिम रहेको चिकित्सकहरु बताउँछन् । उनीहरुका अनुसार खोप लगाएकालाई भने जापानीज इन्सेफ्लाइटिसको जोखिम हुँदैन ।