कांग्रेसमा डिजिटल सदस्यतादेखि प्राइमरीसम्म, संगठन सुधारको नयाँ खाका

काठमाडौं । नेपाली कांग्रेसले पार्टीको आन्तरिक संरचना र कार्यशैलीमा व्यापक परिवर्तन गर्ने योजना अघि सारेको छ । पार्टी सभापति गगनकुमार थापाले १५औँ महाधिवेशनको बन्दसत्रमा प्रस्तुत गरेको राजनीतिक प्रस्तावमा संगठनलाई प्रविधिमैत्री बनाउनेदेखि नेतृत्व चयनको प्रक्रियासम्म सुधार गर्ने प्रस्ताव अघि सारिएको हो ।

थापाको प्रस्तावमा कांग्रेसलाई परम्परागत निर्देशनमुखी संरचनाबाट बाहिर निकालेर सदस्यदेखि नेतृत्वसम्मको सहभागिता र उत्तरदायित्व बढाउने संगठनका रूपमा विकास गर्ने योजना समेटिएको छ । पार्टी सदस्यता वितरण तथा नवीकरण, आन्तरिक छलफल, निर्वाचन र आर्थिक कारोबारलाई डिजिटल प्रणालीमा लैजाने प्रस्ताव गरिएको छ ।

प्रस्तावले पार्टीभित्र पुस्तान्तरणको विषयलाई पनि प्राथमिकतामा राखेको छ । १८ देखि २१ वर्ष उमेर समूहका युवाको सहभागिता र आवाजलाई संस्थागत गर्न ‘युथ काउन्सिल’ तथा अग्रज नेताहरूको अनुभव र ज्ञानलाई उपयोग गर्न ‘विज्डम काउन्सिल’ गठन गर्ने अवधारणा अघि सारिएको छ ।

नेतृत्व र उम्मेदवार छनोटमा देखिँदै आएको पैसा तथा पहुँचको प्रभाव घटाउन प्राथमिक निर्वाचन अर्थात् ‘प्राइमरी’ प्रणाली लागू गर्ने प्रस्ताव पनि थापाले अघि सारेका छन् । त्यस्तै, नेता तथा कार्यकर्ताको मूल्यांकन गुटगत सम्बन्धका आधारमा नभई समुदाय र नागरिकका लागि गरेको सार्वजनिक कामका आधारमा गर्ने नीति प्रस्तावमा समेटिएको छ ।

सभापति थापाले कांग्रेस अब राजनीतिक आश्वासन बाँड्ने दलका रूपमा सीमित हुन नहुने बताएका छन् । नागरिकका दैनिक समस्या समाधान गर्न पार्टीले प्रत्यक्ष रूपमा भूमिका खेल्नुपर्ने उनको भनाइ छ ।

उनले कांग्रेसलाई नीति निर्माण र अनुसन्धानमा केन्द्रित गराउने, युवालाई उद्यमशीलतासँग जोड्ने तथा बदलिँदो समयअनुसार संगठनको क्षमता विकास गर्ने योजना अघि सारेका छन् । आगामी चार वर्षमा कांग्रेसलाई राष्ट्रिय पुनर्जागरण र समुन्नतिको नेतृत्व गर्न सक्ने आधुनिक र भरोसायोग्य राजनीतिक शक्तिका रूपमा स्थापित गर्ने लक्ष्यसमेत प्रस्तावमा राखिएको छ ।