विराटनगरमा ‘एमटी ८८४८’ ब्याण्डको प्रस्तुति 

विराटनगर । विराटनगरस्थित नेपाल बिजनेस कलेजका विद्यार्थीहरूले समाजसेवा र शैक्षिक परियोजनालाई जोड्दै एक बृहत् साँगीतिक च्यारिटी सो आयोजना गर्ने भएका छन् ।

कलेजको बीबीए ७ औँ सेमेस्टरमा अध्ययनरत विद्यार्थीहरूले आगामी चैत २७ गते विराटनगरको जैन भवनमा ‘साँगीतिक च्यारिटी सो’ गर्न लागेको कलेजले विराटनगरमा पत्रकार सम्मेलनको आयोजना गरेर जानकारी दिएको हो ।

Advertisement

साँगीतिक कार्यक्रममा नेपालको चर्चित ब्यान्ड ‘एमटी ८८४८’ को विशेष प्रस्तुती रहने छ । कलेजका विद्यार्थीहरूले आफ्नो ‘प्रोजेक्ट वर्क’ अन्तर्गत यो कार्यक्रम आयोजना गर्न लागेको कलेजकी निर्देशक पिंकी शर्माले जानकारी दिइन् । उनले विद्यार्थीहरूले बजार सर्वेक्षण गरेर नै ब्यान्डको छनोट गरेको बताइन् ।

विद्यार्थीहरूले गरेको सर्भेमा सबैभन्दा बढी रुचाइएको ब्यान्डका रूपमा ‘एमटी ८८४८’ देखिएपछि हामीले सोही ब्यान्डलाई आमन्त्रण गरेका हौँ, निर्देशक शर्मा भनिन् ।

यो कार्यक्रमको मुख्य विशेषता भनेको यसको पूर्ण व्यवस्थापन विद्यार्थी स्वयमले गर्नु हो । कार्यक्रमको प्रायोजक खोज्नेदेखि लिएर बजार व्यवस्थापन र कार्यक्रम सञ्चालनका सबै पक्षहरूमा विद्यार्थीहरू प्रत्यक्ष संलग्न रहेका छन् । यसले उनीहरूको व्यवस्थापकीय क्षमता र व्यावहारिक सीपलाई निखार्ने कलेजको विश्वास छ ।

यस साँगीतिक कार्यक्रमबाट संकलन भएको रकम र खर्च कटाएर बाँकी रहेको बचत रकम सामाजिक उत्तरदायित्वअन्तर्गत ‘विराटेश्वर वृद्धाश्रम’ लाई हस्तान्तरण गरिने छ । यसअघि पनि बीबीए ७ औँ सेमेस्टरका विद्यार्थीले २ पटक सफलतापूर्वक यस्तै च्यारिटी सो सम्पन्न गरिसकेका छन् ।

सन् २०१४ मा मलेसियाको लिंकन युनिभर्सिटीबाट सम्बन्धन प्राप्त गरेको नेपाल बिजनेस कलेजले विराटनगरमा गुणस्तरीय शिक्षा प्रदान गर्दै आएको छ । कलेजका निर्देशक दीपक कोइरालाका अनुसार हाल कलेजमा बीबीए, एमबीए, बीएचएम र बीआइटी संकायमा गरी कूल ३३८ जना विद्यार्थीहरू अध्ययनरत छन् ।

विद्यार्थीहरूलाई केबल किताबी ज्ञानमा मात्र सीमित नराखी सामाजिक कार्य र व्यावसायिक क्षेत्रको व्यावहारिक अनुभव दिलाउन यस्ता कार्यक्रमहरूले ठूलो भूमिका खेल्ने कलेजको भनाइ छ ।