नृत्योपासनाको वार्षिक मूल्यांकन सम्पन्न, सबै विद्यार्थी सफल

विराटनगर । विराटनगरको शनिहाटमा सञ्चालित नृत्य प्रशिक्षण विद्यालय (नृत्योपासना)ले विद्यार्थीहरुको वार्षिक मूल्यांकन सम्पन्न गरेको छ ।

विद्यालयले मूल्यांकन पश्चात उनीहरुलाई प्रमाणपत्र समेत वितरण गरेको छ । शुक्रबार भएको मूल्यांकन परीक्षामा नृत्योपासनामा प्रशिक्षण लिरहेका प्राथमिकदेखि पाँचौं वर्षसम्मका कुल ६ वटा ब्याचको वार्षिक मूल्यांकन गरिएको हो । वार्षिक मूल्यांकनमा पास भएका सबैजना अघिल्लो चरणमा प्रवेश गरेका छन् ।

विद्यार्थीहरुलाई भरत नाट्यम विधामा भारतको चेन्नाईबाट स्नातकोत्तर पूरा गरेकी नृत्योपासना विराटनगरकी सञ्चालक एवं प्रशिक्षक सन्तोष निधि राठीले प्रशिक्षण गराइरहेकी छन् । सो अवसरमा विद्यार्थीहरूलाई परीक्षामा उत्तीर्ण भएको प्रमाणपत्रसमेत प्रदान गरिएको प्रशिक्षक राठीले जानकारी दिइन् ।

प्रमाणपत्र वितरण कार्यक्रममा विद्यार्थीहरूका अभिभावकको समेत उपस्थिति रहेको थियो । नृत्योपासनाले विराटनगरमा शास्त्रीय संगीतका विभिन्न रागमा नृत्य प्रशिक्षण दिँदै आएको सञ्चालक राठीले जानकारी दिइन् ।