धरानमा दुई राउन्ड हवाई फायर गरेर दुई क्विन्टल गाँजासहित पाँच जना पक्राउ

विराटनगर । सुनसरीको धरानमा गाँजा ओसारपसारमा संलग्न रहेको आरोपमा प्रहरीले दुई राउन्ड हवाई फायर गरी दुई क्विन्टलभन्दा बढी गाँजासहित पाँच जनालाई पक्राउ गरेको छ ।
सोमबार (आज) बिहान धरान उपमहानगरपालिका–२० च्यानडाँडाबाट दुई वटा स्कार्पियो गाडीमा लोड गरिएको २ क्विन्टल ९ किलो ४२० ग्राम गाँजासहित उनीहरूलाई नियन्त्रणमा लिएको सुनसरी प्रहरीका सूचना अधिकारी डीएसपी चन्द्रबहादुर खड्काले जानकारी दिए ।

उनका अनुसार आज बिहान करिब ३ बजेतिर गाँजा ओसारपसार भइरहेको विशेष सूचनाका आधारमा इलाका प्रहरी कार्यालय धरानबाट खटिएको टोलीले च्यानडाँडामा दुई वटा स्कार्पियो गाडी जाँच गर्ने क्रममा उक्त गाँजा बरामद गरेको हो। प्रहरी टोलीलाई देखेपछि गाँजासहित भाग्न खोजेपछि उनीहरूलाई नियन्त्रणमा लिन पेस्तोलबाट दुई राउन्ड हवाई फायर गरिएको डीएसपी खड्काले बताए ।

पक्राउ पर्नेमा सप्तरीको डाक्नेश्वरी नगरपालिका–१० का २४ वर्षीय रामसागरकुमार यादव, राजगढ गाउँपालिका–१ का ४५ वर्षीय राजेन्द्रप्रसाद मण्डल, भारतको बिहारस्थित मधुवनीका ३८ वर्षीय सन्तोष ठाकुर, सप्तरीको छिन्नमस्ता गाउँपालिका–६ का ५९ वर्षीय राजकुमार साह र धरान उपमहानगरपालिका–११ का २१ वर्षीय अमृत बिशुङ्ख रहेका छन्।

प्रहरीले उनीहरूको साथबाट बा १ च ५०३८ र को १ च ८१८२ नम्बरका दुई वटा स्कार्पियो गाडीसहित गाँजा बरामद गरेको जनाएको छ। पक्राउ परेका पाँचै जनालाई बरामद गाँजा र गाडीसहित थप अनुसन्धानका लागि इलाका प्रहरी कार्यालय धरानमा राखिएको प्रहरीले जनाएको छ।