इटहरीको जनता क्याम्पसमा ५ करोडको छात्रावास निर्माण सुरु

इटहरी । इटहरीस्थित जनता बहुमुखी क्याम्पसमा अध्ययनरत तथा बाहिरबाट आउने विद्यार्थीहरूको सुविधाका लागि करिब ५ करोड रुपैयाँ लागतमा आधुनिक छात्रावास निर्माण सुरु गरिएको छ । क्याम्पस सञ्चालक समिति अध्यक्ष विकास केसीले उक्त छात्रावासको औपचारिक शिलान्यास गरेका हुन् ।

संघीय सरकारले चालु आर्थिक वर्षमा बहुवर्षीय योजनाअन्तर्गत बजेट विनियोजन गर्दै पहिलो किस्तामा १ करोड ४२ लाख रुपैयाँ निकासा गरेपछि निर्माण कार्य अगाडि बढाइएको हो । क्याम्पसले विद्यार्थीको शैक्षिक गुणस्तर अभिवृद्धि गर्ने उद्देश्यले छात्रावासलाई महत्त्वपूर्ण परियोजनाका रूपमा अघि सारेको अध्यक्ष केसीले जानकारी दिए ।

पहिलो चरणमा छात्र र छात्राका लागि छुट्टाछुट्टै एक तले भवन निर्माण गरिने छ, जसमा कुल १४ वटा कोठा रहने छन् । पहिलो चरणको निर्माण कार्य २०८४ पुस मसान्तभित्र सम्पन्न गर्ने लक्ष्य राखिएको छ ।

दीर्घकालीन योजनाअनुसार छात्रावासलाई ३ तल्लासम्म विस्तार गरिने छ । छात्रावास सञ्चालनमा आएपछि विशेष गरी पूर्वी पहाडी जिल्ला तथा मधेस प्रदेशबाट अध्ययनका लागि आउने विद्यार्थीहरूको डेरा बस्ने बाध्यता हट्ने अपेक्षा गरिएको छ । क्याम्पस सञ्चालक समितिअन्तर्गत शैक्षिक अनुगमन तथा सुपरिवेक्षण समितिका संयोजक शिवराज दाहालले यसले विद्यार्थीलाई ठुलो राहत पुग्ने बताए ।

क्याम्पस प्रमुख डा. गीता अधिकारीका अनुसार छात्रावासले दुर्गम तथा आर्थिक रूपमा कमजोर परिवारका विद्यार्थीलाई शिक्षामा पहुँच विस्तार गर्न मद्दत गर्ने छ । छात्रावासले विद्यार्थीको नियमित उपस्थिति र अध्ययनमा निरन्तरता ल्याउने विश्वास व्यक्त गरे । हाल क्याम्पसले सुनसरी र आसपासका क्षेत्रका विद्यार्थीका लागि ७ वटा निःशुल्क बस सेवा सञ्चालन गर्दै आएको छ । जसबाट बराहक्षेत्र, दुहबी, इनरुवा तथा पूर्वी मोरङसम्मका विद्यार्थी लाभान्वित भएका छन् ।

विश्वविद्यालय अनुदान आयोग नेपालबाट गुणस्तर सुनिश्चितता प्रत्यायन प्राप्त गरिसकेको जनता क्याम्पसमा हाल स्नातक तहमा बीएड, बीबीएस, बीए, बीआईसीटीई तथा स्नातकोत्तर तहमा एमएड र एमबीएस कार्यक्रम सञ्चालनमा छन् । साथै, कक्षा ११ र १२ का कार्यक्रमसमेत सञ्चालनमा रहेका छन्, जहाँ ६ हजारभन्दा बढी विद्यार्थी अध्ययनरत रहेको कलेजले जनाएको छ ।