कोशीसहित तीन प्रदेशमा भारी वर्षाको सम्भावना, सतर्क रहन आग्रह

विराटनगर । पश्चिमी न्यून चापीय प्रणाली र मनसुनी वायुको प्रभाव कायमै रहँदा आज (शुक्रबार) देशका विभिन्न भू–भागमा वर्षा हुने सम्भावना रहेको छ । मौसम पूर्वानुमान महाशाखाका अनुसार कोशी, बागमती र सुदूरपश्चिम प्रदेशका पहाडी क्षेत्रमा तथा कोशी प्रदेशको तराईमा भारी वर्षा हुन सक्नेछ ।

महाशाखाका अनुसार अहिले देशका पहाडी र हिमाली भू–भागसहित कोशी, मधेश, बागमती र गण्डकी प्रदेशका तराई क्षेत्रमा सामान्यतया बादल लागेको छ । अन्य भू–भागमा आंशिक बदली रहेको छ । बागमती, गण्डकी र लुम्बिनी प्रदेशका केही स्थानमा चट्याङसहित मध्यम वर्षा भइरहेको छ ।

शुक्रबार दिउँसो पहाडी र हिमाली क्षेत्रमा मौसम थप बदली हुने अनुमान छ । ती भू–भागका केही स्थानमा चट्याङ, हावाहुरी र असिनासहित मध्यम वर्षा तथा हिमपात हुन सक्ने महाशाखाले जनाएको छ । मधेश प्रदेशसहित कोशी र सुदूरपश्चिमका तराई क्षेत्रमा पनि केही स्थानमा वर्षाको सम्भावना छ । बागमती, गण्डकी र लुम्बिनी प्रदेशका तराईका थोरै स्थानमा चट्याङसहित मध्यम वर्षा हुन सक्नेछ ।

रातिसमेत वर्षाको सम्भावना कायमै रहने पूर्वानुमान छ । कोशी प्रदेशका हिमाली र पहाडी क्षेत्रमा केही स्थानमा तथा बागमती र गण्डकीका हिमाली र पहाडी भू–भागका थोरै स्थानमा वर्षा र हिमपात हुन सक्नेछ । लुम्बिनी, कर्णाली र सुदूरपश्चिमका हिमाली तथा पहाडी भू–भागका एक–दुई स्थानमा पनि चट्याङसहित मध्यम वर्षा र हिमपातको सम्भावना छ ।

राति कोशी प्रदेशको तराईका केही स्थानमा, मधेशका थोरै स्थानमा तथा बागमती र गण्डकीका तराईका एक–दुई स्थानमा वर्षा हुन सक्ने महाशाखाले जनाएको छ । कोशी प्रदेशका पहाडी तथा तराई भू–भागका एक–दुई स्थानमा भारी वर्षा हुन सक्ने पूर्वानुमान छ ।

वर्षाको सम्भावना रहेका क्षेत्रमा आवश्यक सतर्कता अपनाउनुपर्ने देखिन्छ । विशेषगरी भारी वर्षा हुने स्थानमा स्थानीय अवस्था हेरेर यात्रा तथा बाहिरी गतिविधि सञ्चालन गर्न एवं आवश्यक सतर्कता अपनाउन महाशाखाले आग्रह गरेको छ ।