कोशी प्रदेशमा अपराध : १ वर्षमा साढे ९ हजार मुद्दा दर्ता

विराटनगर । कोशी प्रदेशमा पछिल्लो १ वर्षको अवधिमा करिब साढे ९ हजार मुद्दा प्रहरीमा दर्ता भएका छन् ।

१४ जिल्ला रहेको कोशीमा २०८१ वैशाखदेखि चैतसम्म ९ हजार ४ सय ६१ मुद्दा दर्ता भएका हुन् । यो संख्या अघिल्लो वर्षको तुलनामा ३ सय ३५ ले बढी हो । २०८० को वैशाखदेखि चैतसम्म ९ हजार १ सय २६ वटा मुद्दा प्रहरीमा दर्ता भएका थिए ।

Advertisement

२०८१ को वैशाखमा ८ सय ४१, जेठमा ९ सय ६२, असारमा ९ सय ६७, साउनमा ९ सय ६२, भदौमा ८ सय १७, असोजमा ६ सय १८, कात्तिकमा ८ सय ४६, मंसिरमा ७ सय २५, पुसमा ६ सय ३०, माघमा ६ सय ८३, फागुनमा ६ सय ६५ र चैतमा ७ सय ७२ मुद्दा दर्ता भएको प्रदेश प्रहरी कार्यालय विराटनगरले जनाएको छ ।

कार्यालयका अनुसार पछिल्लो १ वर्षको अवधिमा आत्महत्याका १ हजार २ सय ३, बैंकिङ कसुरका १ हजार ८९, लागुऔषधका १ हजार १ सय ५, सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसुरका १ हजार ८ र भवितव्य ज्यान सम्बन्धी ७ सय ७२ वटा मुद्दा प्रहरीमा दर्ता भएका छन् ।

चोरीका ४ सय ३०, जबरजस्ती करणीका ३ सय ९०, सवारी ज्यान सम्बन्धी २ सय ९९, ठगी र अपराधिक विश्वासघातका १ सय ९८, ज्यान मार्ने उद्योगका १ सय ३०, बहुविवाहका १ सय ८ र कर्तव्य ज्यानका ९० वटा घटना दर्ता भएका छन् । त्योबाहेक अन्य विभिन्न अपराधिक घटनासँग सम्बन्धित मुद्दा प्रहरीमा दर्ता भएको छ ।

कोशी प्रदेशका निमित्त प्रहरी प्रमुख एसएसपी भीमबहादुर दाहालले लागुऔषधविरुद्ध प्रहरी निर्मम बनेको बताए । ‘लागुऔषध बरामद र त्यससँग सम्बन्धित व्यक्ति पक्राउको नतिजाले नै प्रहरी कडा रूपमा प्रस्तुत भएको प्रष्ट हुन्छ,’ उनले भने, ‘लागुऔषध कारोबारीलाई गोली हानेर भए पनि नियन्त्रणमा लिने प्रहरीको रणनीति छ ।’

प्रहरीले सोमबार मात्रै झापामा २ राउण्ड हवाई फायर गरेर २ सय ग्राम ब्राउन सुगर बरामद गरेको छ । लागुऔषधविरुद्ध विभिन्न जनचेतनामूलक अभियान सञ्चालन गर्नेदेखि दुव्र्यसनविरुद्ध आमा र फ्यान अभियान चलाइएको जानकारी दाहालले दिए । यो अभियानले निकट भविष्यमा सकारात्मक नतिजा दिने अपेक्षा गरिएको उनको भनाइ छ ।

‘लागुऔषधले परिवार र समाज तहसनहस बनाइसक्यो । नियन्त्रणमा लिन प्रहरीले व्यापक रूपमा काम गरिरहेको छ । यसले भविष्यमा सकारात्मक परिणाम दिने अपेक्षा छ,’ उनले भने । त्यस्तै प्रहरीले आत्महत्या न्यूनीकरण विशेष अभियान पनि चलाइरहेको छ । अभियानमार्फत आत्महत्याको दरलाई कम गर्न सफल भइएको एसएसपी दाहालले बताए ।

उनका अनुसार प्रहरीमा अपराध नियन्त्रण र अनुसन्धान गर्ने विशेषज्ञ टोली नै परिचालित रहेका कारण पछिल्लो समय संगठित अपराधका घटना हुन पाएका छैनन् । कुनै घटना भएमा प्रहरी सक्रियताका कारण तत्काल अनुसन्धानको दायरामा ल्याउन प्रहरी सफल भएको उनको भनाइ छ ।

‘समाजमा अपराध नै नभएका हैनन् । तर, ठूला र संगठित अपराध हुन पाएका छैनन् । कुनै अपराध भइहाले तत्काल नियन्त्रणमा लिन सकिएको छ । अपराध गरेर भारततिर भागेकालाई पनि पक्राउ गर्न प्रहरी सफल भएको छ । विदेशबाट आएर अपराध गर्नेलाई तत्काल नियन्त्रणमा लिएर कारबाहीको दायरामा ल्याइएको छ,’ दाहाल भन्छन् । उनका अनुसार पहिचान नभएका अपराधीलाई पनि पहिचान गरेर पक्राउ गर्दै अनुसन्धानको दायरामा ल्याउन प्रहरी सफल भइरहेको छ ।

दाहालले पछिल्लो समय कोशी प्रदेशमा पत्ता नलागेका अपराधिक घटना नरहेको जानकारी दिए । ‘सबैतिरको शान्ति सुरक्षाको अवस्था मजवुत बनाइएको छ । अधिकांश घटनामा प्रहरीले सफलता प्राप्त गरेको छ । अपराधमा संलग्नलाई पत्ता लाग्न सक्नु नै अनुसन्धानमा सफलता हो । अपराध अनुसन्धान र नियन्त्रणकै कोणबाट हेर्दा कोशी प्रदेश अब्बल देखिन्छ,’ उनी भन्छन् ।

अवैध चोरी निकासी, तस्करी, सीमा अपराध नियन्त्रणमा उल्लेख्य सफलता प्राप्त भएको उनको भनाइ छ । साथै उद्धारका काम समयमै हुने गरेको बताउँदै एसएसपी दाहालले उद्धारलाई थप प्रभावकारी बनाउन गृहकार्य भइरहेको जानकारी दिए ।

जनसंख्या वृद्धि, अपराधको नयाँ ‘ट्रेन्ड’, अपराध गर्ने फरकफरक तरिका र शैली, साइबर क्राइम आदिले गर्दा केही चुनौती भने थपिएको प्रहरीको बुझाइ छ । यद्यपि, कोशी प्रदेशमा पछिल्लो समय अधिकांश भवितव्य घटनाहरु छन् ।

प्राकृतिक प्रकोेप, दुर्घटनाजस्ता भवितव्य घटना, आत्महत्या, आवेश प्रेरित अपराध प्रहरीको नियन्त्रणमा नहुने दाहालले बताए । तर, यस्ता घटना न्यूनीकरणका लागि ‘प्रो एक्टिभ पुलिसिङ’को काम भइरहेको छ । ‘प्राय समाजमा हुने अपराध न्यूनीकरण र नियन्त्रण प्रहरीको एकल प्रयासले मात्रै सम्भव छैन । सरोकारवालाहरुको सामूहिक प्रयास आवश्यक छ,’ दाहालले भने ।

कतिपय अपराध बढ्नुमा सामाजिक संरचना कारक बनिदिने उनको भनाइ छ । यद्यपि, पछिल्लो समय पूर्वमा संगठित, ठूला र नियोजित हिसाबका अपराध नभएको उनले बताए । ‘भएका अपराधको पनि तत्काल सफलतापूर्वक अनुसन्धान गरिएको छ । अपराधमा संलग्नलाई कारबाहीको दायरामा ल्याइएको छ । अनुसन्धान नटुंगिएका पुराना घटना छैनन्,’ एसएसपी दाहाल भन्छन् ।