सिजन गुरुङले ज्यान मुद्दाका अभियुक्तलाई बनाए तरुण दल इटहरीको अध्यक्ष

विराटनगर । नेपाली कांग्रेसको भ्रातृ संगठन तरुण दल सुनसरीको विवाद उत्कर्षमा पुगेको छ ।

तरुण दल सुनसरीका अध्यक्ष सिजन गुरुङले तरुण दलको इटहरी उपमहानगर समितिलाई आफ्नो कब्जामा लिएर अवैधानिक हिसाबले नयाँ कार्यसमिति बनाएको भन्दै विरोध भएपछि विवाद बाहिर आएको हो । इटहरी उपमहानगरपालिका–२० तरहरा घर भएका गुरुङ कांग्रेसको महाधिवेशन प्रतिनिधि र कोशी प्रदेश सदस्यसमेत हुन् ।

गुरुङमाथि कांग्रेसको आवरणमा गुण्डागर्दीको राज चलाएको आरोप लाग्ने गरेको छ । पार्टीभित्रको संस्थापनइतर अर्थात् डा. शेखर कोइराला पक्षधर उनीमाथि विधिविधान मिचेर गतिविधि गरिरहेको आरोपसमेत थपियो । गुरुङले अपराधिक पृष्ठभूमिका युवालाई विधानविपरीत तरुण दलमा पदीय जिम्मेवारी दिएको पनि फेला परेको छ ।

उनले नेपाल तरुण दलको चौथो अधिवेशनबाट २०७३ मा निर्वाचित इटहरी उपमहानगर कार्यसमितिलाई कुनै जानकारी नदिइकन नयाँ नगर समिति गठन गरेका छन् । उनले सामाजिक सञ्जाल फेसबुकमार्फत वैशाख ८ गते सोमबार नेपाल तरुण दल इटहरी उपमहानगर समिति तथा अन्य समिति गठन भएको सार्वजनिक गरेका थिए ।

तरुण दल सुनसरीका अध्यक्ष सिजन गुरुङ । 

तरुण दल इटहरीले भने विज्ञप्ति जारी गरेर गुरुङको घोषणा विधानविपरीत रहेको जनाएको छ । ‘कुनै पनि सूचना नदिइकन तरुण दलको विधानविपरीत नगर समितिको अधिकारमाथि हस्तक्षेप गर्नु अवैधानिक हो,’ तरुण दल इटहरीका वर्तमान अध्यक्ष विष्णु खत्री र सचिव बादल दाहालद्वारा जारी विज्ञप्तिमा भनिएको छ, ‘यस विषयमा नेपाल तरुण दल इटहरी उपमहानगर समितिको गम्भीर ध्यानाकर्षण भएको छ ।’

गुरुङले ज्यान मुद्दाका अभियुक्त इटहरी–९ का गोरे भनिने अनिष सुवेदीको अध्यक्षतामा तरुण दल इटहरीको नयाँ कार्यसमिति घोषणा गरेका हुन् । प्रहरीका अनुसार सुवेदीविरुद्ध ज्यान मार्ने उद्योगको मुद्दा चलेको थियो । उनी झुम्का कारागारसमेत चलान भएको प्रहरीको भनाइ छ । २०८१ साल भदौमा ज्यान मार्ने उद्योग मुद्दामा प्रतिवादी बनाइएका सुवेदी केही समयअघि मात्रै छुटेको प्रहरी स्रोतले बतायो ।

सुवेदीको अध्यक्षतामा गठन गरिएको समितिको उपाध्यक्षमा मनिष चौधरी, सचिवमा सविन निरौला, सह–सचिवाम विक्रम चौधरी र कोषाध्यक्ष स्मारिका सुवेदी छन् । १९ सदस्यीय कार्यसमिति सर्वसम्मत भएको जानकारी गुरुङले दिए ।

इटहरी उपमहानगरमा २० वटा वडा छन् । तरुण दलको उपमहानगर अधिवेशनका लागि सबै वडाबाट प्रतिनिधि चयन हुनुपर्छ । तर, कुनै पनि वडाबाट प्रतिनिधि चयन नगरिकन र तरुण दलको उपमहानगर समिति तथा पार्टीलाई समेत थाहा नदिइकन एक्कासि फेसबुकमार्फत नयाँ कार्यसमिति घोषणा गरिएको खत्रीले बताए ।

उनका अनुसार तरुण दलको विधान अनुसार वडा अधिवेशन नगरिकन नगर अधिवेशन गर्न मिल्दैन । ‘नगर अधिवेशनका प्रतिनिधि नै वडाबाट छानिएर आउनुपर्ने हुन्छ । प्रतिनिधि भित्रबाटै नयाँ कार्यसमिति चयन हुने हो । पाँचौं नगर अधिवेशनका लागि वडा अधिवेशन गर्न खोज्दै थियौं । तर, नगर समितिलाई थाहै नदिइकन नयाँ समिति घोषणा हुँदा हामी अचम्ममा परेका छौं,’ खत्रीले भने ।

उनले भ्रातृ संस्थाको अधिवेशन विधिगत रूपमा हुनुपर्ने बताए । ‘मेरो नेतृत्वको तरुण दलले विधान अनुसार काम गरिरहेको छ । वडाहरुमा पूर्णकालीन सदस्यता वितरणको काम भइरहेको थियो । सदस्यता वितरण र वडा अधिवेशन सकेर उपमहानगर अधिवेशन गर्ने योजना थियो । तर, अवैधानिक हिसाबले हस्तक्षेप गरेर कार्यसमिति गठन गरेको थाहा भयो । यसले हाम्रो मानमर्दन भएको छ,’ उनी भन्छन् ।

तरुण दलका १ सदस्य संगठनलाई पार्टीको जस्तै गुटको सिकार बनाउन खोजिएको बताउँछन् । कार्यसमितिमा भएकाको मानहानि गर्दै गुरुङले एकलौटी गरेको उनको भनाइ छ । तरुण दलका ती सदस्यले पार्टीभित्रको गुटलाई तरुण दलमा देखाउन खोजिनु गलत भएको बताए ।

‘गुरुङले प्रतिनिधिबिना नै पार्टीको भ्रातृ संगठनको उपमहानगर समिति गठन गरेको र पार्टीका नेतालाई समेत थाहा नदिएको पाइयो । अपराधमा जोडिएका र आफ्ना आसेपासेलाई कार्यसमितिमा राखिएको छ । गुरुङको गतिविधिले तरुण दललाई भाँड्ने र विवाद बढाउने काम भयो । राजनीतिमा सक्रिय नभएका र गुण्डागर्दी एवं अपराधमा लागेकालाई समितिमा राखिएको छ,’ उनले भने । उनका अनुसार गुरुङले तरुण दललाई गुण्डाहरुको संगठन बनाउने प्रयास गरिरहेका छन् ।

तरुण दलको नेतृत्वमा गलत मान्छेलाई ल्याउँदा पार्टीको सिंगो अभियानलाई नै असर पर्ने कतिपयको बुझाइ छ । तरुण दलका जिल्ला अध्यक्ष गुरुङ पार्टीभित्रको इतर अर्थात डा. शेखर पक्षधर र तरुण दलका उपमहानगर समिति अध्यक्ष खत्री संस्थापन अर्थात शेरबहादुर देउवा पक्षधर हुन् ।

गुण्डागर्दीका माध्यमबाट विभिन्न अपराधिक गतिविधिमा संलग्न भएको आरोपमा गुरुङ यसअघि बारम्बार पक्राउ परेका छन् । पछिल्लोपटक उनी २०७५ साल जेठ ११ गते गुण्डागर्दीको आरोपमा पक्राउ परेका थिए । आफ्नो कर्तुत लुकाउन कांग्रेसमा सक्रिय रहेका गुरुङ गुण्डागर्दी गर्ने, व्यापारी र सर्वसाधारणलाई धाकधम्की दिने, असुली धन्दा मच्चाउने, ठेक्का कब्जा गर्ने जस्ता विवादमा बारम्बार मुछिने गरेको तरुण दलका सदस्यहरु बताउँछन् ।

तरुण दलले खोज्यो पार्टीको सहयोग

गुरुङले संगठनभित्र मनपरी गर्न थालको भन्दै तरुण दलको इटहरी उपमहानगर समितिले पार्टीको सहयोग खोजेको छ । पार्टीले यथाशीघ्र छलफल गरी गुरुङको अवैधानिक कदम र विवादलाई टुंगो लगाइदिनुपर्ने मागसमेत तरुण दलको छ ।

गुरुङले आधिकारिक समितिलाई थाहै नदिइकन नयाँ कार्यसमिति घोषणा गरेपछि अध्यक्ष विष्णु खत्री र सचिव बादल दाहालले विज्ञप्ति जारी गर्दै नगर समितिको अधिकारमाथि गुरुङले विधानविपरीत हस्तक्षेप गर्नु अवैधानिक भएको उल्लेख गरेका छन् ।

तरुण दल इटहरीको पाँचौं अधिवेशन गर्नलाई वडा अधिवेशनको तयारी भइरहेका बेला जिल्ला कार्यसमितिको अवैधानिक कदमले नेपाल तरुण दलको अभियानलाई मात्र नभएर समग्र नेपाली कांग्रेसकै अभियानलाई असर पार्ने विज्ञप्तिमा उल्लेख छ । विज्ञप्तिमार्फत गुरुङको गतिविधिको भत्र्सना र विरोधसमेत गरिएको छ ।

‘जिल्ला समितिको अवैधानिक कदमलाई नेपाली कांग्रेस पार्टीले यथाशीघ्र छलफल गरी विधि, विधान र नियमसंगत कार्य गर्नेगरी विवादलाई टुंगो लगाउन पहल गरिदिनुहुन उपमहानगर कार्यसमिति परिवार हार्दिक अपिल गर्दछौं,’ विज्ञप्तिमा भनिएको छ । पार्टीलाई पत्र नै पठाएर गुरुङको अवैधानिक कामको जानकारी गराइएको खत्रीले बताए ।

गुरुङले भने तरुण दलको केन्द्रीय कार्यसमितिले चैत ३१ गतेसम्म सबै जिल्ला तथा आफू मातहतको अधिवेशन सम्पन्न गर्न निर्देशन दिएर पत्राचार गरेको बताउँछन् । केन्द्रकै निर्देशन अनुसार पार्टीको वडा र पालिका अधिवेशन गरिएको उनले बताए ।

‘तरुण दल सुनसरी जिल्ला कार्यसमितिले बैठक बसेर चैत २६ गतेसम्म सबै पालिकाको अधिवेशन गरिसक्नु भनेर पत्र पठाइएको थियो । जिल्लाका १२ वटा पालिकाका केहीका अध्यक्षहरु सम्पर्कविहीन भएर बसे । फेरि बोलाएर वैशाख २ गतेसम्म गरिसक्नु भन्यौं । बाध्यात्मक परिस्थितिले अधिवेशन लम्बिएमा चाँडोभन्दा चाँडो गर्नु भनिए पनि कतिपयले वास्तै गरेनन्,’ गुरुङले भने ।

तरुण दलका पालिका अध्यक्षहरु सम्पर्कमा नआएमा जिल्ला समितिले प्रतिनिधि पठाएर अधिवेशन सम्पन्न गर्न केन्द्रले निर्देशन दिएको र त्यही अनुरुप अधिवेशन गरिएको उनको भनाइ छ । ‘अधिवेशनबाट बनेको कार्यसमिति कुनै हालतमा अवैधानिक हैन । संगठनमा बसेर माथिल्लो तहको निर्देशन पालना नगर्ने र अधिवेशन सकिएपछि अवैधानिक भनेर विवाद झिक्ने काम भयो,’ गुरुङ भन्छन् ।

ज्यान मुद्दाका अभियुक्तलाई नेतृत्वमा ल्याएको विषयमा गुरुङले अभियोग लागेकै भरमा कसैलाई पनि रोक्न नहुने बताए । उनले भने, ‘अन्य पार्टीमा पनि विभिन्न अभियोग लागेकाहरु छन् । अभियोग लागेकै भरमा नेतृत्वमा पुग्नबाट रोक्नुपर्छ भन्ने छैन । सम्बन्धित निकायबाट आरोप पुष्टि भयो भने पार्टीको विधान अनुसार निर्णय भइहाल्छ । यसलाई अन्यथा मान्न हुँदैन ।’