झापाबाट चलचित्र ‘पाँच पाण्डव’ को छायांकन सुरु

काठमाडौं। काली रानी फिल्मस्को ब्यानरमा निर्माण हुन लागेको बहुप्रतीक्षित चलचित्र ‘पाँच पाण्डव’ को छायांकन सोमबारदेखि औपचारिक रूपमा सुरु भएको छ। झापाको नेपाल–भारत सीमावर्ती सहर काँकडभिट्टामा क्यामेरा पूजा र शुभ–मुहूर्त गर्दै चलचित्रको छायांकन थालिएको हो।

ठूलो लगानीमा निर्माण हुन लागेको यस चलचित्रमा हरिवंश आचार्य, जितु नेपाल, आर्यन सिग्देल, महेश त्रिपाठी र सागर लम्साल (बले) मुख्य भूमिकामा रहेका छन्। चलचित्रको शीर्षक ‘पाँच पाण्डव’ राखिए पनि यो कुनै पौराणिक कथा नभएर समकालीन समाजको कथामा आधारित ‘सोसल ड्रामा’ रहेको निर्माण पक्षले जनाएको छ। चलचित्रमा दीपाश्री निरौला र जनी गुरुङ महिला मुख्य पात्रका रूपमा देखिनेछन्।

वसन्त निरौलाको निर्देशनमा तयार हुन लागेको यस चलचित्रको कथा, पटकथा तथा संवाद सुशील पौडेलले लेखेका हुन्। नवीन श्रेष्ठ प्रस्तुतकर्ता रहेको यस चलचित्रका निर्माता काली रानी श्रेष्ठ हुन्। झापाका विभिन्न स्थानमा करिब ४० दिन छायांकन गरिने यस चलचित्रलाई श्याम तामाङले खिच्नेछन्।

नेपाली चलचित्र क्षेत्रमा गुणस्तरीय प्रविधिको प्रयोग गर्दै यो फिल्म ‘फूल डल्बी एट्मस साउन्ड’ मा तयार पारिनेछ। दिग्गज र नयाँ पुस्ताका चर्चित कलाकारहरूको एउटै पर्दामा उपस्थिति रहने भएकाले प्रदर्शनअघि नै यस चलचित्रको निकै चर्चा चुलिएको छ।