
खोटाङ। पूर्वाधार विकास कार्यालय खोटाङले दिखुवा खोलाको पुल निर्माणमा ढिलासुस्ती गर्ने निर्माण व्यवसायीको बैंक ग्यारेन्टी जफत गर्ने चेतावनी दिएको छ। दिक्तेल रुपाकोट मझुवागढी नगरपालिका–४ खाल्ले र वडा नम्बर १५ विजयखर्कको सिमानामा पर्ने यस पुलको काम सन्तोषजनक नभएपछि कार्यालयले कारबाहीको प्रक्रिया अगाडि बढाएको हो।
पुल निर्माणको ठेक्का लिएको अंशुवी/नेपाल फूलबारी/पिंगला ज्वइन्ट भेन्चर सुनसरीलाई पत्राचार गर्दै ७ दिनभित्र बैंक ग्यारेन्टी जफत गर्नु नपर्ने कारण खुलाएर स्पष्टीकरण दिन निर्देशन दिइएको छ। हालसम्म मोटरेबल पुलको एकातर्फको फाउन्डेसन खन्ने कार्य समेत सम्पन्न हुन नसकेको र बाँकी समयमा सम्झौता बमोजिम काम सकिने आधार नदेखिएकाले स्पष्टीकरण सोधिएको पूर्वाधार विकास कार्यालय खोटाङका प्रमुख इन्जिनियर बिनम दाहालले बताए।
कोशी प्रदेश भौतिक पूर्वाधार विकास मन्त्रालय अन्तर्गत पूर्वाधार विकास कार्यालय गाईघाट र प्रदेश सडक पुल सहयोग इकाइ इटहरीको साझेदारीमा यो ट्रस ब्रिज निर्माण सुरु गरिएको हो। दिक्तेल–खानीडाँडा–रेग्मीटार सडक खण्डमा पर्ने यो पुल बनेमा दिक्तेलबाट रेग्मीटार पुग्न महुरे–बुइपा सडकभन्दा करिब १७ किलोमिटर छोटो दुरी हुनेछ।
साढे ५ करोड रुपैयाँको कुल लागतमा निर्माण हुने यस पुलका लागि प्रदेश सडक पुल सहयोग इकाइले २ करोड बढीको स्टिलका सामान उपलब्ध गराएको छ। निर्माण व्यवसायी बसन्त बुढाथोकीले गत पुस २३ गते सम्झौता गरेको यस पुलको शिलान्यास तत्कालीन मन्त्री भुपेन्द्र राईले गत जेठ १७ गते गरेका थिए। निर्माण कम्पनीले भने अधिकांश सामग्री निर्माणस्थलमा ल्याइएको भए पनि मेसिन अभावमा काम अघि बढ्न नसकेको जवाफ दिएको छ।

























