तनवीरः तीन दशकदेखि मेसिनसँग साइनो

विराटनगर । सधैँं आफ्नो ग्यारेजमा व्यस्त हुने तनवीर अन्सारी शनिबार भने केही फुर्सदिला भेटिए । ४८ वर्षीय तनवीर मेसिनसँग जोडिएको ३३ वर्ष भइसक्यो ।

जीवनको यो मोडमा आइपुग्दा उनी कमै फुर्सदिला हुन्छन् । विराटनगर–९ मा उनको ‘युनिक मोटरसाकल रिपेयरिङ सेन्टर’ नामको ग्यारेज सञ्चालनमा छ ।

Advertisement

मेसिनसँग मात्र होइन, त्यहाँ मेसिनरी समस्या लिएर आउने हरेक ग्राहकसँग पनि उत्तिकै प्रेम छ तनवीरको । आर्थिक अभाव र सानै उमेरमा पारिवारिक जिम्मेवारी काँधमा आएका कारण औपचारिक शिक्षा लिन पाएनन् । १५ वर्षको उमेरमै उनले परिवारको रोजीरोटीका लागि ग्यारेजको काम रोजे ।

त्यहीँबाट अरुकै ग्यारेजमा कामको अनुभव बटुल्दै अगाडि बढेको तनवीरको जीवन अहिले आफ्नै स्वामित्वमा रहेको ग्यारेजमा आएर जोडिएको छ ।

शून्यबाट सुरु गरेको ग्यारेजमा अहिले उनले १० जनालाई रोजगारी दिएका छन् । ग्यारेजको कमाइले घर खर्च मात्रै धानेका छैनन, छोराछोरीलाई पढाइरहेका पनि छन् ।

यही कामले आफूलाई चिनाएको र इज्जत पाएकाले आफ्नो कर्मप्रति गर्व गर्छन् उनी । भन्छन्, ‘मलाई यही कामले चिनाएको हो, यही कामले इज्जत पनि दिएको छ ।’

उनको ग्यारेजमा तीन दशक अगाडि देखिका ग्राहक सवारी साधन मर्मतका लागि आउने गर्छन् । बुवादेखि छोराछोरी समेत गरी दुई पुस्ता उनको कामसँग जोडिएका छन् । नियमित रुपमा आफ्ना सवारी साधन मर्मत गर्न आउने गरेको उनको भनाइ छ ।

यति लामो अवधिमा उनले धेरैलाई चिनेका छन् । उनलाई चिन्ने मान्छेहरुको पनि कमी छैन । कसरी यस्तो ? जिज्ञासाको जवाफमा अन्सारी भन्छन्, ‘काम प्रतिको लगाव र इमान्दारिताले मान्छे कमाउन सकेको हुँ ।’