रंगेलीको आदर्श माविमा ४१ औँ वार्षिकोत्सव तथा अभिभावक दिवस सम्पन्न

विराटनगर । मोरङको रंगेली नगरपालिका–७ मा रहेको आदर्श माध्यमिक विद्यालयले आफ्नो ४१औँ वार्षिक उत्सव तथा अभिभावक दिवस विविध कार्यक्रमका साथ भव्य रूपमा सम्पन्न गरेको छ ।

शैक्षिक उपलब्धि, सिर्जनशीलता र विद्यार्थीको व्यवहारिक सिप प्रदर्शन गर्ने उद्देश्यले आयोजना गरिएको कार्यक्रममा विद्यालय परिवार, अभिभावक, स्थानीय जनप्रतिनिधि, शिक्षक र समाजसेवीलगायतको उल्लेख्य उपस्थिति रहेको थियो । उत्सवको अवसरमा विद्यालयले आन्तरिक अतिरिक्त क्रियाकलापअन्तर्गत हाजिरीजवाफ प्रतियोगिता, हस्तलेखन प्रतियोगिता तथा विविध सिर्जनात्मक गतिविधि सञ्चालन गरेको थियो ।

Advertisement

विद्यार्थीहरूले मःम, भक्का, पानीपुरीजस्ता स्थानीय तथा लोकप्रिय परिकारहरू आफैँ तयार गरी बिक्रीवितरणसमेत गरेका थिए । जसले उनीहरूमा उद्यमशीलता, सहकार्य र व्यवहारिक ज्ञानको विकासमा टेवा पुर्‍याएको देखिन्थ्यो ।

साथै, विज्ञान प्रयोगशालामा आधारित प्रयोगात्मक सामग्री तथा लोपोन्मुख वस्तुहरू संकलन गरी राखिएको प्रदर्शनीले कार्यक्रमलाई थप आकर्षक बनाएको थियो । कार्यक्रमकी प्रमुख अतिथि रंगेली नगरपालिकाकी उपप्रमुख भुमाकुमारी पराजुलीले सामुदायिक विद्यालयहरूमा स्थानीय सरकारको चासो र निगरानी बढ्दै गएको उल्लेख गर्दै यसले पठनपाठनको गुणस्तर र भौतिक पूर्वाधार दुवै क्षेत्रमा सकारात्मक परिवर्तन ल्याएको बताइन् ।

विशिष्ट अतिथि शिक्षा विकास तथा समन्वय इकाई मोरङका प्रमुख सालिग्राम दाहालले सामुदायिक विद्यालयको सुदृढीकरणमा शिक्षक, अभिभावक र स्थानीय तहबीचको सहकार्य अपरिहार्य रहेको धारणा व्यक्त गरे । कार्यक्रममा वडाध्यक्ष रामचन्द्र मण्डलले विद्यालयको निरन्तर प्रगतिप्रति खुशी व्यक्त गर्दै आगामी दिनमा आवश्यक सहयोग गर्ने प्रतिबद्धता जनाए ।

कार्यक्रममा विद्यालयका प्रधानाध्यापक बिश्वर सिंह मेवाहाङले विद्यालयको वार्षिक प्रतिवेदन प्रस्तुत गर्दै शैक्षिक उपलब्धि, विद्यार्थी संख्या, शैक्षिक सुधारका प्रयास र भावी योजना बारे जानकारी गराए । विद्यालय व्यवस्थापन समितिका अध्यक्ष वीरेन्द्र मण्डल, स्थानीय समाजसेवी मचिन्द्र कटुवाल, नेपाल शिक्षक संघ मोरङका अध्यक्ष विनोद यादव, नेपाल शिक्षक संघ रंगेलीका अध्यक्ष चिरञ्जीवी काफ्ले लगायतले विद्यालयको भूमिका र योगदानको प्रशंसा गरेका थिए ।

उत्सवका क्रममा विद्यालयका पूर्वशिक्षक तथा वर्तमान शिक्षकहरूलाई सम्मानपत्र र दोसल्ला ओढाएर सम्मान गरिएको थियो । साथै, मोफसलमा रहेर लामो समयदेखि पत्रकारितामा सक्रिय रहेर विभिन्न सञ्चारमाध्यममा आबद्ध पत्रकार रवीन्द्र बराललाई सम्मानपत्रसहित दोसल्ला ओढाएर सम्मान गरिएको थियो ।

कार्यक्रमभर साना–साना बालबालिकाले प्रस्तुत गरेका नृत्य तथा सांस्कृतिक प्रस्तुतिले उपस्थित अभिभावक र अतिथिहरूलाई भरपूर मनोरञ्जन प्रदान गरेको थियो । आदर्श माविको ४१औँ वार्षिक उत्सव तथा अभिभावक दिवस शैक्षिक उपलब्धि, सिर्जनशीलता र सामुदायिक सहभागिताको प्रभावशाली उदाहरणका रूपमा सम्पन्न भएको सहभागीहरूले बताएका छन् ।