जेभियर्स स्कुलको वार्षिकोत्सवमा विद्यार्थी सम्मानित

विराटनगर । मोरङको बुढीगंगा गाउँपालिका–२ मा रहेको जेभियर्स इङ्ग्लिस स्कुलले  ११ औँ वार्षिकोत्सव तथा अभिभावक दिवस मनाएको छ ।

वार्षिकोत्सव तथा अभिभावक दिवसको अवसरमा स्कुलले बुढीगंगा गाउँपालिका स्तरीय परीक्षा, एसइई र हिसानको वार्षिक परीक्षामा पालिका भित्रमा उत्कृष्ट नतिजा ल्याएका विद्यार्थीलाई सम्मान गरेको छ ।
कक्षा ८ को पालिका स्तरीय परीक्षामा छात्रतर्फ अंकित कार्की क्षेत्री, छात्रातर्फ रितु मगर, एसईईमा छात्रतर्फ विजय पौडेल र छात्रातर्फ अञ्जली दास, हिसान परीक्षामा छात्रातर्फ ललिता राजवंशी र छात्रतर्फ रोहन दाहाल उत्कृष्ट भएका थिए ।

Advertisement

उत्कृष्ट विद्यार्थीहरूलाई बुढीगंगा गाउँपालिकाका अध्यक्ष जितनारायण थापा मगर, विद्यालयका प्रिन्सिपल परेश पोखरेल, प्याब्सन मोरङका अध्यक्ष जगत बस्नेत लगायतले सम्मानपत्र प्रदान गरे ।

त्यस्तै, दोस्रो सुटिङ बल विश्वकप प्रतियोगितामा नेपाललाई रजत पदक दिलाउने कक्षा १२ की प्रमिशा श्रेष्ठ र राष्ट्रपति रनिङ शिल्ड प्रतियोगिता २०८१ मा कराँते खेलमा उत्कृष्ट प्रदर्शन गर्ने पुष्पराज योक्पाङ्गदेनलाई पनि सम्मान गरियो ।

कार्यक्रममा गाउँपालिका अध्यक्ष मगरले गाउँपालिकाभित्रको शिक्षामा सुधार भएको बताए । उनले शिक्षामा स्वस्थ प्रतिस्पर्धा आवश्यक रहेको बताए । विद्यालय र अभिभावकबीच राम्रो समन्वय हुन सके शिक्षामा धेरै सुधार हुने उनको भनाइ छ ।  प्याब्सन मोरङका अध्यक्ष बस्नेतले जेभियर्स स्कुलले सीपयुक्त शिक्षा दिएको बताए । अध्ययनसँगै विद्यार्थीमा सीप पनि आवश्यक रहेको उनले बताए ।

स्कुलका प्रिन्सिपल परेश पोखरेलले कक्षा नर्सरीदेखि १२ सम्म अध्ययनका लागि बुढीगंगा छाडेर अन्यत्र जानु नपर्ने बताए । उनले बुढीगंगाभित्र जेभियर्सले उत्कृष्ट शिक्षा दिइरहेको दाबी गरे । स्कुलका हरेक विद्यार्थी हरेक विधामा उत्कृष्ट रहेको सुनाए । उनले शिक्षासँगै सीप पनि विद्यालयले दिइरहेको बताए ।

स्कुलकी अध्यक्ष सरिताकुमारी राना मगरले गुणस्तरीय शिक्षाका लागि स्कुलले अहोरात्र काम गरिरहेको बताइन् । शिक्षक, अभिभावक, विद्यार्थी सबैको सहयोगका कारण विद्यालयले शैक्षिक उपलब्धि हासिल गर्न सफल भएको प्रस्ट्याइन् ।  कार्यक्रममा विद्यार्थीहरूले नृत्य, गायन लगायतका विभिन्न विधामा प्रस्तुति दिएका थिए । स्कुलमा ९५० जनाभन्दा बढी विद्यार्थी अध्ययनरत छन् ।