चौतर्फी दबाबपछि पुनः सार्वजनिक भयो ब्रिज कोर्स र तयारी कक्षा बन्द गर्ने सूचना

काठमाडौं । शिक्षा, विज्ञान तथा प्रविधि मन्त्रालयले प्रवेश परीक्षा तयारी कक्षा र ब्रिज कोर्सहरू बन्द गर्ने सम्बन्धी सूचना चौतर्फी चासो र दबाबपछि पुनः सार्वजनिक गरेको छ ।

मन्त्रालयले आइतबार जारी गरेको उक्त सूचना सोमबार बिहान हटाएको थियो । तर, दिनभरि विभिन्न क्षेत्रबाट प्रतिक्रिया र दबाब बढेपछि मन्त्रालयले सोमबार साँझ पुनः सूचना प्रकाशन गरेको हो । नयाँ सूचनामा आगामी २०८३ साल वैशाख १ गतेदेखि यस्ता सबै तयारी कक्षा र ब्रिज कोर्सहरू पूर्ण रूपमा बन्द गरिने स्पष्ट उल्लेख गरिएको छ ।

मन्त्रालयका अनुसार विद्यालय तथा उच्च शिक्षामा भर्नाअघि सञ्चालन हुने यस्ता कक्षाले विद्यार्थीको मनोविज्ञानमा नकारात्मक असर पार्ने, शिक्षामा समान पहुँचमा बाधा सिर्जना गर्ने र अभिभावकमाथि अनावश्यक आर्थिक भार थप्ने देखिएको निष्कर्ष निकालिएको छ ।

पछिल्ला वर्षहरूमा निजी क्षेत्रबाट सञ्चालन हुँदै आएका ब्रिज कोर्स र तयारी कक्षाहरू महँगो हुँदै गएको तथा यसले शिक्षा प्रणालीमा असमानता बढाएको भन्दै सरोकारवालाहरूले आलोचना गर्दै आएका थिए । मन्त्रालयको पछिल्लो निर्णयले अब यस्तो अभ्यासलाई औपचारिक रूपमा अन्त्य गर्ने संकेत दिएको छ ।