एसईईको उत्तरपुस्तिका परीक्षा केन्द्रमै परीक्षण, एक महिनाभित्र नतिजा

काठमाडौं । राष्ट्रिय परीक्षा बोर्डले माध्यमिक शिक्षा परीक्षा (एसईई), २०८२ को उत्तरपुस्तिका सम्बन्धित परीक्षा केन्द्रबाटै परीक्षण गर्ने निर्णय गरेको छ । एक महिनाभित्र नतिजा सार्वजनिक गर्ने लक्ष्यसहित यो व्यवस्था लागू गरिएको हो ।

परीक्षा नियन्त्रक टुकराज अधिकारीका अनुसार सबै केन्द्रमा परीक्षण गर्ने तयारी गरिएको छ । तर, शिक्षक अभाव वा असुरक्षा महसुस भएमा शिक्षा विकास तथा समन्वय एकाइको सहजीकरणमा अन्य स्थानमा परीक्षण गर्न सकिनेछ ।

यसअघि गोप्य रूपमा परीक्षण केन्द्र तोकी एक प्रदेशको उत्तरपुस्तिका अर्को प्रदेशमा पठाउने प्रचलन थियो । ढिलो नतिजाका कारण विद्यार्थीमा मनोवैज्ञानिक असर परेको गुनासोपछि यसवर्ष नयाँ व्यवस्था लागू गरिएको हो । साथै, एसईईपछि सञ्चालन हुने ‘ब्रिज कोर्स’मा रोक लगाउने निर्णय पनि गरिएको छ ।

यसवर्ष चैत १९ गते बिहीबारदेखि परीक्षा सुरु हुँदैछ । देशभर १ हजार ९६६ केन्द्र तोकिएका छन् । जसमा एउटा केन्द्र जापानमा पनि रहेको छ ।

परीक्षामा कुल ५ लाख १२ हजार ४२१ विद्यार्थी सहभागी हुनेछन् । तीमध्ये २ लाख ५७ हजार ६१३ छात्रा, २ लाख ५४ हजार ८०१ छात्र र ७ जना अन्य छन् ।

बोर्डले सबै तयारी पूरा भएको जनाउँदै परीक्षा शान्तिपूर्ण र भयरहित रूपमा सञ्चालन गर्न आग्रह गरेको छ । परीक्षा केन्द्रमा प्रश्नपत्र पुर्याउनेदेखि कर्मचारी खटाउने र आवश्यक सुरक्षा व्यवस्था मिलाउने सबै काम सम्पन्न भसकेको बोर्डले जनाएको छ ।