दुई दिने सार्वजनिक बिदामा नेसनल प्याब्सनकाे असन्तुष्टि

काठमाडौं ।सरकारको दुई दिने सार्वजनिक बिदा सम्बन्धी निर्णयप्रति राष्ट्रिय निजी तथा आवासीय विद्यालय एसोसिएसन नेपाल (नेसनल प्याब्सन)ले असन्तुष्टि जनाएको छ । नेसनल प्याब्सनका अध्यक्ष गीता राणा क्षेत्री र महासचिव प्रतापबहादुर थापाले विज्ञप्ति जारी गर्दै असन्तुष्टि जनाएका हुन् ।

मन्त्रिपरिषद् बैठकले चैत २२ गते पेट्रोलियम पदार्थको खपत घटाउने र वैदेशिक मुद्रा सञ्चिति जोगाउने उद्देश्यले हप्तामा शनिवार र आइतबार सार्वजनिक बिदा दिने निर्णय गरेको थियो । उक्त निर्णयले विद्यालय तहको शैक्षिक क्यालेन्डरमा दीर्घकालीन असर पार्ने नेसनल प्याब्सनले जनाएको छ ।

नेसनल प्याब्सनका अनुसार हप्तामा दुई दिन बिदा कायम हुँदा वार्षिक रूपमा करिब ४० दिन थप बिदा हुने अवस्था सिर्जना हुने र सरकारले निर्धारण गरेको पाठ्यक्रम तोकिएको समयमा सम्पन्न गर्न गम्भीर चुनौती उत्पन्न गर्ने नेसनल प्याब्सनले जनाएको छ । शैक्षिक सत्र सुरु हुने मिति वैशाख १ बाट १५ गतेमा सार्ने निर्णयले पनि शैक्षिक क्यालेन्डरमा थप दबाब सिर्जना गर्ने नेसनल प्याब्सनको भनाइ छ ।