अनुशासन र व्यवहारिक ज्ञान नै सफलताको कडी

विराटनगर । विराटनगर–१० स्थित अरनिको सेकेन्डरी स्कुलले माध्यमिक शिक्षा परीक्षा (कक्षा १२) मा सहभागी हुन लागेका आफ्ना विद्यार्थीहरूलाई एक भव्य समारोहका बीच बिदाइ गरेको छ ।

आगामी वैशाख १४ गतेदेखि सुरु हुने बोर्ड परीक्षामा सम्मिलित हुन लागेका विद्यालयको ३२ औँ ब्याचका १ हजार २ सय जना विद्यार्थीलाई शनिबार विशेष शुभकामनासहित बिदाइ गरिएको हो । स्कुलमा कक्षा ११ मा अध्ययनरत विद्यार्थीहरूले आफ्ना अग्रजहरूको सम्मानमा सो सांस्कृतिक बिदाइ कार्यक्रमको आयोजना गरेका हुन् ।

कार्यक्रमका प्रमुख अतिथि एवं स्कुलका प्रिन्सिपल राजेश कार्कीले विद्यार्थीहरूलाई उज्ज्वल भविष्यको शुभकामना दिँदै अरनिकोले केवल किताबी ज्ञानमा मात्र सीमित नरही समयसापेक्ष व्यवहारिक शिक्षामा जोड दिएको बताए ।

यहाँबाट दीक्षित भएका विद्यार्थीहरूले स्वदेश तथा विदेशका प्रतिष्ठित विश्वविद्यालयहरूमा पूर्ण छात्रवृत्ति प्राप्त गरी मेडिकल र इन्जिनियरिङ जस्ता विषयहरूमा सफलता पाइरहेको कार्कीले प्रस्ट्याए । उनले भने, ‘तपाईंहरूको अनुशासन र लगनशीलताले नै भोलिको सुनौलो भविष्य तय गर्ने छ । परीक्षालाई बोझका रूपमा नलिनुहोस् । परीक्षामा आफूलाई सहज बनाउँदै परीक्षा दिए उत्कृष्ट अंक आउने छ ।’

सो अवसरमा शिक्षक विकास खनाल र नेपाल पत्रकार महासंघ मोरङकी अध्यक्ष सुशीला पाठकले पनि विद्यार्थीहरूलाई सफलताको शुभकामना दिए । उनीहरूले विद्यालयको गरिमालाई उच्च राख्दै निर्धक्क भएर परीक्षामा सहभागी हुन विद्यार्थीहरूलाई हौसला प्रदान गरे ।

बिदाइ कार्यक्रमको अवसरमा कक्षा १२ को त्रैमासिक परीक्षामा उत्कृष्ट नतिजा ल्याउने विद्यार्थीहरूलाई पुरस्कृत समेत गरिएको थियो । परीक्षामा प्रथम हुने मन्जिला ओझा, द्वितीय हुने प्रतिमा रौनियार र तृतीय हुने प्राञ्जल नेपाललाई नगद पुरस्कारसहित सम्मान गरियो ।
बिदाइ भई जान लागेका विद्यार्थीहरू अनिक मण्डल, अर्पिता राजवंशी र मुस्कान गुप्ताले विद्यालयमा बिताएका दुई वर्षको अनुभव सुनाएका थिए । उनीहरूले अरनिको स्कुलको पढाइको वातावरण, शिक्षकहरूको सहयोग र व्यवहारिक सिकाइ पद्धतिले गर्दा आफूहरूमा आत्मविश्वास बढेको बताए । त्यस्तै, कक्षा ११ की विद्यार्थी सुन्निमा न्यौपानेले अग्रजहरूलाई सफलताको शुभकामना दिँदै बिदाइ मन्तव्य राखेकी थिइन् ।

बिदाइ कार्यक्रमलाई थप उल्लासमय र स्मरणीय बनाउन विद्यार्थीहरूले विभिन्न आकर्षक नृत्य, गीत तथा मनोरञ्जनात्मक प्रस्तुतिहरू प्रदर्शन गरेका थिए । कार्यक्रममा विद्यार्थीहरूको उत्साहजनक सहभागिता रहेको थियो ।

लामो समयदेखि गुणस्तरीय शिक्षामा आफ्नो छुट्टै पहिचान बनाएको अरनिको स्कुलले हरेक वर्ष विद्यार्थीहरूलाई यसरी नै प्रोत्साहन र मार्गदर्शनसहित बिदाइ गर्ने परम्परालाई निरन्तरता दिँदै आएको छ ।