प्रधानमन्त्रीद्वारा विश्वविद्यालय नेतृत्वसँग समन्वय

काठमाडौं । प्रधानमन्त्री बालेन शाह (बालेन्द्र)ले देशभरका विश्वविद्यालय र स्वास्थ्य विज्ञान प्रतिष्ठानका उपकुलपतिहरूसँग सोमबार सिंहदरबारमा सामूहिक छलफल गर्दै शैक्षिक क्षेत्रका समस्या समाधानमा सरकार सहयोगी रहने प्रतिबद्धता जनाएका छन् ।

प्रधानमन्त्री निवासमा आयोजित उक्त बैठकमा प्रधानमन्त्री स्वयं कुलपति रहने ११ विश्वविद्यालय र सात प्रतिष्ठानका प्रमुखहरू सहभागी थिए । छलफलमा शैक्षिक गुणस्तर, प्रशासनिक जटिलता, स्रोत अभाव, जनशक्ति व्यवस्थापन तथा नीतिगत अस्पष्टताजस्ता विषय उठाइएको थियो ।

Advertisement

उपकुलपतिहरूले संस्थागत सुधारका लागि तत्काल र दीर्घकालीन उपाय आवश्यक रहेको धारणा राखेका थिए । उनीहरूले सरकारसँग समन्वय अभाव, बजेट सीमितता र ऐन नियम कार्यान्वयनका समस्याका बारेमा समेत ध्यानाकर्षण गराएका थिए ।

प्रधानमन्त्री शाहले उठाइएका विषयप्रति गम्भीरता देखाउँदै समाधान सम्भव रहेका विषयमा छिटो पहल गरिने बताएका छन् । साथै, जटिल समस्या समाधानका लागि नीतिगत समन्वय र आवश्यक सहयोग उपलब्ध गराइने आश्वासन दिएका थिए ।

बैठकमा त्रिभुवन विश्वविद्यालय, काठमाडौं विश्वविद्यालय लगायत विभिन्न विश्वविद्यालय तथा बीपी कोइराला स्वास्थ्य विज्ञान प्रतिष्ठान, पाटन स्वास्थ्य विज्ञान प्रतिष्ठान जस्ता स्वास्थ्य संस्थाका उपकुलपतिहरूको उपस्थिति रहेको थियो ।