कोशीमा विद्यार्थी संगठनका अफिस, झन्डा र ब्यानर हटाउन प्रहरीको आग्रह

विराटनगर । कोशी प्रदेशका क्याम्पसहरूमा विद्यार्थी संगठनका अफिस, झन्डा, ब्यानर र पर्चा–पम्प्लेट हटाउन प्रहरीले आग्रह गरेको छ ।

सम्बन्धित क्याम्पस प्रशासन र विद्यार्थी संगठनहरुलाई प्रहरीले यस्तो आग्रह गरेको हो । शैक्षिक संस्थालाई राजनीतिक प्रभावबाट मुक्त बनाउने सरकारी नीति सार्वजनिक भएसँगै प्रदेश प्रहरी सक्रिय रूपमा क्याम्पस केन्द्रित कारबाहीमा उत्रिने भएको हो । नेपाल प्रहरी प्रधान कार्यालयअन्तर्गतको कार्य विभागले क्याम्पसमा विद्यार्थी संगठनका नाममा भइरहेका राजनीतिक गतिविधि नियन्त्रण गर्न मुलुकभरका सबै प्रदेश प्रहरी कार्यालयसहित मातहतका प्रहरी कार्यालयहरुलाई निर्देशन दिएको थियो ।

Advertisement

उक्त निर्देशन अनुसार कोशी प्रदेशका प्रहरी प्रमुख डीआईजी विनोद घिमिरेले क्याम्पसहरूमा रहेका विद्यार्थी संगठनसँग सम्बन्धित सबै प्रकारका संरचना र प्रचार सामग्री हटाउन लगाउने भन्दै निर्देशन दिएका छन् । प्रहरी र क्याम्पस प्रशासनको समन्वयमा हाल विभिन्न क्याम्पसहरूमा विद्यार्थी संगठनहरूले सञ्चालन गर्दै आएका अफिसहरू हटाउने, झन्डा र ब्यानर निकाल्ने तथा पर्चा–पम्प्लेट सफा गर्ने काम भइरहेको छ ।

कोशीमा प्रहरीले बिहीबारदेखि विद्यार्थी संगठनका अफिस, झन्डा, ब्यानर र पर्चा–पम्प्लेट हटाउन आग्रह गरेको छ । सरकारले सार्वजनिक गरेको १०० दिने कार्यसूचीअन्तर्गत विद्यालय र क्याम्पसभित्र दलगत गतिविधि नियन्त्रण गर्दै शैक्षिक वातावरणलाई निष्पक्ष र अध्ययनमुखी बनाउने लक्ष्य लिइएको छ । सरकारले विद्यार्थी संगठनहरू खारेज गर्ने तयारी अघि बढाइरहेका बेला त्यसलाई कार्यान्वयनमा लैजान प्रहरी सक्रियता बढाइएको स्रोतले बतायो ।

विभिन्न दल सम्बद्ध विद्यार्थी संगठनहरुले भने सरकारको निर्णयको विरोध गरिरहेका छन् । शिक्षाविद्हरूले पनि शैक्षिक संस्थामा शान्त र अध्ययनमुखी वातावरण कायम गर्न सुरक्षा निकायको सक्रियता आवश्यक भए पनि विद्यार्थीहरूको लोकतान्त्रिक अभ्यासलाई पूर्ण रूपमा निरुत्साहित गर्ने नीति दीर्घकालीन रूपमा विवादास्पद हुन सक्ने बताएका छन् । उनीहरूले ‘नियन्त्रण र स्वतन्त्रता’ बीच सन्तुलन कायम गर्नुपर्नेमा जोड दिएका छन् ।

‘विद्यार्थी संगठनका अफिस, झन्डा, ब्यानर र पर्चा–पम्प्लेट हटाउन लगाउने भनेर तालुक कार्यालयबाट निर्देशन आएको छ । निर्देशन कार्यान्वयन गर्न प्रहरी सक्रियता बढाइएको छ,’ स्रोतले भन्यो । यसको प्रभाव आगामी दिनमा क्याम्पसको वातावरण, विद्यार्थी राजनीति र समग्र शिक्षा प्रणालीमा प्रत्यक्ष रूपमा देखिने अनुमान गरिएको छ ।