त्रिभुवन विश्वविद्यालय : एलएलबी दोस्रो वर्षको प्रश्नपत्रमा गम्भीर त्रुटि

विराटनगर । मुलुककै जेठो र ठूलो विश्वविद्यालय त्रिभुवन विश्वविद्यालयको परीक्षा सञ्चालनमा लापरबाही देखिएको छ । एलएलबी दोस्रो वर्षको ‘निर्वाचन कानुन’ (Election Law) विषयको परीक्षाको प्रश्नपत्रमा गम्भीर त्रुटि देखिएको हो ।

पाँचवटा प्रश्न सोधिएको परीक्षाको दोस्रो प्रश्नमा ‘फ्युचर’ (Future) लेख्नुपर्ने स्थानमा ‘फेलियर’ (Failure) लेखिएको थियो भने अर्को तेस्रो प्रश्नमा ‘इलाब्रेट’ (Elaborate) हुनुपर्ने ठाउँमा ‘इलेक्सन’ (Election) लेखिएको थियो छ । बिहीबार परीक्षा सुरु भएको करिब आधा घण्टापछि मात्र प्रश्नपत्रमा गल्ती भएको भन्दै सच्याउन लगाइएको थियो ।

परीक्षाको तनावपूर्ण वातावरणमा बसेका विद्यार्थीका लागि प्रश्नपत्रमा ‘फेलियर’ जस्ता शब्द देखिनु र अर्थ नै नलाग्ने गरी प्रश्न सोधिनुले विश्वविद्यालयको गुणस्तर र संवेदनशीलतामाथि गम्भीर प्रश्न उठाएको छ ।

प्राध्यापक डा. चन्द्र तिम्सिना यसलाई सामान्य त्रुटि मान्न तयार छैनन् । उनले यसलाई विद्यार्थीको भविष्यमाथिको खेलबाडका रूपमा टिप्पणी गरेका छन् । ुप्रश्नपत्र तयार गर्दा तहगत रूपमा ‘क्रस चेक’ हुने व्यवस्था हुन्छ । तर, यसरी अर्थ नै अनर्थ लाग्ने गरी त्रुटि हुनु गम्भीर विषय हो,’ डा. तिम्सिना भन्छन्, ‘प्रश्नपत्र विद्यार्थीले सहजै बुझ्ने भाषामा हुनुपर्छ । जार्गन शैली वा अस्पष्ट भाषाले विद्यार्थीलाई अलमलमा पार्छ ।’

उनले प्रश्नपत्र निर्माण गर्दा सरल र स्पष्ट भाषाशैली प्रयोग गर्नुपर्नेमा जोड दिए । एलएलबी दोस्रो वर्षको परीक्षा नियमित समयभन्दा निकै ढिलो अर्थात् १६ महिनापछि सञ्चालन भएको थियो । यसअघि गत वर्षको मंसिरमा प्रथम वर्षको परीक्षा भएको थियो ।

परीक्षा समयमा नहुँदा शैक्षिक क्यालेन्डर प्रभावित भइरहेको छ । शैक्षिक अभियान्ता योगराज दाहाल विश्वविद्यालयले साना र सामान्य देखिने तर दूरगामी असर पार्ने कुरामा ध्यान नदिँदा विद्यार्थीहरूले अनाहकमा दुःख पाइरहेको बताउँछन् ।

त्रिभुवन विश्वविद्यालय कानुन संकायका डिन डा. दिनानाथ पराजुलीले त्रुटि भएको विषयमा परीक्षा नियन्त्रण कार्यालयमा बुझ्ने बताउँछन् । परीक्षासँग जोडिएका विषयहरू परीक्षा नियन्त्रण कार्यालय बल्खुले नै हेर्ने बताउँदै उनले प्रश्नपत्रमा भएको त्रुटिका विषयमा आफूले बुझ्ने प्रतिक्रिया दिए ।

यस्तो थियो प्रश्नपत्र