नयाँ शैक्षिकसत्र औपचारिक रूपमा सुरु

काठमाडौं । देशभर नयाँ शैक्षिकसत्र आज (मंगलबार)देखि औपचारिक रूपमा सुरु भएको छ । सरकारको पछिल्लो निर्णयअनुसार अबदेखि प्रत्येक वर्ष वैशाख १५ गतेदेखि नयाँ शैक्षिकसत्र सुरु हुने छ ।

यसअघि शैक्षिकसत्र वैशाख २ गतेबाट सुरु हुन्थ्यो । तर, नयाँ व्यवस्था लागू भएसँगै कक्षा सञ्चालन र भर्ना प्रक्रिया केही समय पछि सारिएको छ । शिक्षा मन्त्रालयका अनुसार नयाँ शैक्षिकसत्रसँगै विद्यालयहरूमा विद्यार्थी भर्ना प्रक्रिया तीव्र बनेको छ ।

Advertisement

निजी तथा संस्थागत विद्यालयहरूले भर्ना कार्य सुरु गरिसकेका छन् । सरकारले भने कानूनविपरीत असुल गरिँदै आएको भर्ना शुल्क तथा अन्य अतिरिक्त शुल्क फिर्ता गर्न गत चैत २२ गते नै निर्देशन दिइसकेको छ ।

विद्यालय तहको शैक्षिक गतिविधि व्यवस्थित बनाउन र एकरूपता कायम गर्न नयाँ मिति लागू गरिएको सरकारको भनाइ छ । यस निर्णयले शैक्षिक क्यालेन्डरलाई थप व्यवस्थित बनाउने दाबी सरकारको छ ।

तर, केही स्थानीय तहले भने यसअघिदेखि नै विद्यार्थी भर्ना सुरु गरिसकेका छन् । नयाँ शैक्षिकसत्रसँगै विद्यालयहरूमा नियमित कक्षा सञ्चालन र शैक्षिक वातावरण विस्तारै सक्रिय हुँदै जाने छ ।