दमकको विद्यालयका प्रधानाध्यापक र लेखापालविरुद्ध भ्रष्टाचार मुद्दा

विराटनगर । झापाको दमकस्थित एक सामुदायिक विद्यालयका तत्कालीन प्रधानाध्यापक र लेखापालविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ ।

आयोगले दमक नगरपालिका–२ स्थित हिमालय माध्यमिक विद्यालयका तत्कालीन प्रधानाध्यापक ओमप्रसाद उपाध्याय आचार्य र लेखापाल दयासागर आचार्यविरुद्ध विशेष अदालत काठमाडौंमा मंगलबार आरोपपत्र दायर गरेको हो । आयोगका अनुसार विद्यालयमा निर्माण भएको नमुना विद्यालय भवनको काममा वास्तविक मूल्यांकनभन्दा बढी रकम देखाई झुट्टा बिल र भर्पाई तयार गरिएको पाइएको छ ।

सोही आधारमा बढी भुक्तानी लिई सरकारी तथा सार्वजनिक रकम हिनामिना गरिएको आरोप उनीहरूमाथि लागेको हो । त्यसैगरी, विद्यालयको नगद रकम पनि व्यक्तिगत प्रयोजनका लागि प्रयोग गरी दुरुपयोग गरिएको अनुसन्धानबाट खुलेको आयोगले जनाएको छ ।

आयोगले भ्रष्टाचार निवारण ऐन, २०५९ अनुसार करिब ९ लाख ३३ हजार रुपैयाँ बिगो कायम गर्दै कैद, जरिबाना तथा बिगो असुलउपरको मागदाबी गरेको छ । विशेष अदालतमा दायर मुद्दा अब प्रक्रियागत सुनुवाइमा जानेछ ।