महेन्द्र मोरङको बीबीए’फेरवेल’का लागि होटल छनोट गर्दा ‘सेटिङ’ !

विराटनगर । विराटनगरस्थित महेन्द्र मोरङ आदर्श बहुमुखी क्याम्पसको बीबिए संकायले आयोजना गर्न लागेको विदाई र स्वागत कार्यक्रमका लागि होटल छनोट गर्ने प्रक्रिया विवादित बनेको छ । होटल छनोटका क्रममा मिलेमतो (सेटिङ) गरिएको र प्रक्रियामा पारदर्शिता नअपनाइएको भन्दै कलेज प्रशासनमाथि मिलेमताेकाे गम्भीर आरोप लागेको हो ।

वैशाख १८ गते होटल मनास्लुमा आयोजना हुन लागेको उक्त कार्यक्रममा करिब ६०० विद्यार्थी, शिक्षक र कर्मचारी सहभागी हुने तय भएको छ । सो कार्यक्रमका लागि प्रतिव्यक्ति २२ सय रुपैयाँका दरले होटल मनास्लुसँग सम्झौता गरिएको छ । तर, सुरुमा पेश भएका कोटेशनहरूलाई बेवास्ता गर्दै नियोजित रूपमा मनास्लुलाई छनोट गरिएको अन्य प्रस्तावकहरूको दाबी छ।

Advertisement

कार्यक्रमका लागि कलेजले होटलहरूसँग दररेट प्रस्ताव माग गरेको थियो । सुरुमा होटल मनास्लुले प्रतिव्यक्ति २३ सय रुपैयाँको प्रस्ताव पेश गरेको थियो । त्यस्तै, कञ्चनजंघा ब्यांक्वेटले २२५० र होटल श्रीकृष्णले २५५० रुपैयाँको दररेट प्रस्ताव गरेका थिए ।

न्यूनतम दररेट प्रस्ताव गर्नेलाई छनोट गर्नुपर्ने सामान्य प्रक्रिया भएपनि अन्तिम समयमा होटल मनास्लुलाई दररेट घटाउन लगाएर २२०० कायम गरी सम्झौता गरिएको  हाे । अन्य प्रस्तावकहरूले भने एक पटक कोटेशन पेश भइसकेपछि निश्चित होटललाई मात्रै मूल्य परिमार्जन गर्ने मौका दिनु ‘सेटिङ’ भएको भन्दै विरोध जनाएका छन् ।

कञ्चनजंघा ब्यांक्वेटका सञ्चालक अमिस बरालले कलेजले नियोजित रूपमा पहिले नै तय भएको होटललाई जिम्मा दिन प्रस्ताव फेर्न लगाएको आरोप लगाए ।

बीबिए कार्यक्रम संयोजक मोहन श्रेष्ठका अनुसार कञ्चनजंघा ब्यांक्वेटले पेश गरेको २२५० रुपैयाँ दररेट उल्लेख भएको ‘सक्कल’ कोटेशन फाइल क्याम्पस प्रमुखकै कार्यकक्षबाट हराएको थियाे । संयोजक श्रेष्ठले भने, ‘क्याम्पस प्रमुखको टेबुलबाटै फाइल हरायाे, पछि त्यसको फोटोकपी मात्र भेटिएको थियो ।’ उनले यसमा आफ्नो कुनै व्यक्तिगत स्वार्थ नरहेको र क्याम्पस प्रमुखकै निर्देशनमा मनास्लुको दररेट घटाइएको दाबी गरे ।

आर्थिक अपारदर्शिताको प्रश्न उठेपछि संयोजक श्रेष्ठले आफू पारदर्शी रहेको स्पष्टीकरण दिएका छन् । उनले सुरुमा मनास्लुकै दररेट कम देखिएकाले क्याम्पस प्रमुखले दर घटाउन भन्नुभएको र त्यसैका आधारमा सम्झौता भएको बताए ।  वैशाख १८ गते हुने भनिएको यस कार्यक्रममा ४६५ विद्यार्थी र अन्य कर्मचारी गरी करिब ६०० जना सहभागी हुने उनले बताए ।

 भिडियाेका लागि यहाँ क्लिक गर्नुहाेस्