एभरेष्टमा विद्यार्थी अभिमुखीकरणः ‘लक्ष्य र मेहनत नै सफलताको आधार’

विराटनगर । विराटनगर–५ स्थित एभरेष्ट स्कुलले कक्षा ११ मा भर्ना भएका नयाँ विद्यार्थीहरूका लागि एक विशेष अभिमुखीकरण कार्यक्रम सम्पन्न गरेको छ । विद्यार्थीहरूलाई भविष्यको मार्गनिर्देशन गर्ने र शैक्षिक वातावरणसँग परिचित गराउने उद्देश्यले आयोजित उक्त कार्यक्रममा विभिन्न क्षेत्रका व्यक्तित्वहरूले धारणा राखेका थिए ।

कार्यक्रमका प्रमुख वक्ता एवं उत्प्रेरक डा. ताराप्रसाद गिरीले विद्यार्थीहरूलाई विभिन्न उदाहरण प्रस्तुत गर्दै उत्प्रेरित गरे । उनले कक्षा ११ र १२ उच्च शिक्षाको आधारस्तम्भ भएको बताउँदै यी दुई वर्षको कडा मेहनतले नै भविष्यको आकार तय गर्ने उल्लेख गरे । ‘लक्ष्यसहितको संकल्प लिएर अघि बढ्दा मात्र व्यक्ति सफल हुन्छ,’ डा. गिरीले भने, ‘तपाईंहरू केवल एक व्यक्ति मात्र नभई परिवारको सपना र देशको भविष्य पनि हुनुहुन्छ, त्यसैले आफ्नो भूमिकाप्रति सचेत रहनुपर्छ ।’

Advertisement

विद्यालयका प्रिन्सिपल टीकाराम पुरीले विद्यार्थीको सर्वाङ्गीण विकासका लागि विद्यालयले कुनै कसर बाँकी नराख्ने प्रतिवद्धता व्यक्त गरे । उनले शैक्षिक विकासका लागि आवश्यक पर्ने साधन र स्रोतको अभाव हुन नदिने बताउँदै विद्यार्थीहरूलाई अनुशासनमा रहेर अध्ययन गर्न आग्रह गरे ।

त्यस्तै, भाइस प्रिन्सिपल कुन्दन पुरीले विश्वविद्यालय तहको शिक्षा कस्तो हुने भन्ने कुरा कक्षा ११ र १२ को अध्ययनले निर्धारण गर्ने हुँदा गम्भीर भएर मेहनत गर्न सुझाव दिए । कार्यक्रममा कलेजका कोअर्डिनेटर भुवन गौतमले कलेजको अनुशासन, उपलब्ध सेवा सुविधा र नियमहरूका बारेमा जानकारी गराएका थिए ।

विगत लामो समयदेखि गुणस्तरीय शिक्षा प्रदान गर्दै आएको एभरेष्ट स्कुलले विज्ञान, कम्प्युटर विज्ञान र व्यवस्थापन संकायमा कक्षा ११ र १२ को अध्यापन गराउँदै आएको छ । साथै, विद्यालयले यसै शैक्षिक सत्रदेखि बीआईटीको समेत अध्यापन सुरु गर्न लागेको जानकारी दिएको छ ।