औषधि विज्ञानमा ‘एमफार्म’ कार्यक्रम सञ्चालन गर्दै मनमोहन प्राविधिक विश्वविद्यालय

विराटनगर । कोशी प्रदेश सरकारद्वारा स्थापित मनमोहन प्राविधिक विश्वविद्यालयले औषधि विज्ञानमा स्नातकोत्तर तहको ‘एमफार्म’ कार्यक्रम सञ्चालन गर्ने तयारी थालेको छ । औषधि उत्पादन, नियमन, विश्लेषण र अनुसन्धानका लागि आवश्यक दक्ष जनशक्ति स्वदेशमै उत्पादन गर्ने लक्ष्यका साथ विश्वविद्यालयले यो पहल सुरु गरेको हो ।

विश्वविद्यालयको ‘स्कुल अफ मेडिसिन एन्ड एलाइड हेल्थ साइन्सेस’ अन्तर्गतको फार्मेसी विभागले आइतबार विराटनगरमा ‘एमफार्म इन फर्मास्युटिक्स करिकुलम डेभलपमेन्ट’ विषयक कार्यशाला आयोजना गरी सरोकारवालाहरूसँग पाठ्यक्रमबारे गहन छलफल गरेको छ ।

कार्यशालामा कार्यपत्र प्रस्तुत गर्दै पाठ्यक्रम विज्ञ डा. धर्मप्रसाद खनालले प्रस्तावित पाठ्यक्रमले औषधि विज्ञानमा व्यावसायिकता, नैतिकता र अनुसन्धानलाई प्राथमिकता दिने बताए । उनले यो कार्यक्रमले फार्मेसी क्षेत्रको नेतृत्व गर्न सक्ने र राष्ट्रिय तथा अन्तर्राष्ट्रिय कानुनहरूको विश्लेषण गर्न सक्ने जनशक्ति तयार पार्ने उल्लेख गरे ।
अर्का विज्ञ प्रा.डा. उत्तम बुढाथोकीले अन्तर्राष्ट्रिय मापदण्ड र नेपालका औषधि उद्योगहरूको आवश्यकतालाई केन्द्रमा राखेर पाठ्यक्रम निर्माण भइरहेको जानकारी दिए ।

नेपाल फार्मेसी काउन्सिलकी रजिस्ट्रार उषा तण्डुकारले नेपालमा औषधि विज्ञानका उच्च दक्ष जनशक्तिको ठुलो माग रहेको बताइन् । उनले भनिन्, ‘औषधि उद्योग, सरकारी नियामक निकाय, शिक्षण संस्था र अनुसन्धान प्रयोगशालाका लागि एमफार्म गरेका जनशक्तिको माग उच्च छ । काउन्सिलले एमफार्म उत्तीर्ण गर्नेहरूलाई सूचीकृत गर्न ऐन संशोधनको प्रक्रियासमेत अघि बढाएको छ ।’

औषधि उद्योगीहरू राजेश प्रसाईं र राजु अधिकारीले विश्वविद्यालयले उद्योगको आवश्यकता अनुसारको व्यावहारिक पाठ्यक्रम बनाएमा उत्पादित जनशक्तिलाई रोजगारी दिन उद्योगहरू तयार रहेको प्रतिबद्धता जनाए । यस्तै, औषधि व्यवस्था विभाग कोशीकी निमित्त प्रमुख संजिता बर्माले दक्ष जनशक्तिको अभावमा नियमनमा समेत कठिनाइ भइरहेको अवस्थामा मनमोहनको यो प्रयास सराहनीय भएको बताइन् ।

विश्वविद्यालयका रजिस्ट्रार डा. किशोर अधिकारीले सरोकारवालाका सुझावहरू समेटेर पाठ्यक्रमलाई अन्तिम रूप दिइने र देश सुहाउँदो उच्चस्तरीय शिक्षा प्रदान गरिने बताए । फार्मेसी विभागका संयोजक शाहिविजय रिजालले एमफार्म कार्यक्रमका लागि आवश्यक प्रयोगशाला र भौतिक पूर्वाधारहरू तयारी अवस्थामा रहेको र पाठ्यक्रम स्वीकृत हुनासाथ पठनपाठन सुरु गरिने जानकारी दिए ।

हाल यो विश्वविद्यालयमा स्नातक तहको ‘बीफार्म’ कार्यक्रम सञ्चालन भइरहेको छ । एमफार्म सुरु भएपछि औषधि विज्ञानमा उच्च शिक्षाका लागि विदेश जानुपर्ने बाध्यतामा कमी आउने विश्वास लिइएको छ । कार्यशालामा पूर्वाञ्चल विश्वविद्यालयका डीन श्यामकुमार मल्लिक, नेपाल फार्मेसी एसोसिएसन कोशीका सचिव दीपेन्द्र खड्कालगायतले पनि धारणा राखेका थिए ।