एभरेष्ट स्कुलको हाइकिङः प्रकृति र एकताको खुला पाठशाला

विराटनगर । भ्रमण केवल मनोरञ्जन र तस्विर खिच्ने माध्यम मात्र नभई जीवनकै अविस्मरणीय सिकाइ बन्न सक्छ भन्ने उदाहरण विराटनगरस्थित एभरेष्ट स्कुलका विद्यार्थीहरूले प्रस्तुत गरेका छन् । विद्यालयको कक्षा १२ मा अध्ययनरत विद्यार्थीहरूले मोरङको लेटाङ नगरपालिका–१ स्थित ऐतिहासिक तथा प्राकृतिक पर्यटकीय स्थल ‘राजारानी’ क्षेत्रको एकदिने शैक्षिक हाइकिङ सम्पन्न गरेका हुन् ।

शनिबार बिहान लेटाङ–२ को किराँत चोकबाट सुरु भएको पदयात्रा चुरे पहाडको उकालो छिचोल्दै राजारानी ताल पुगेको थियो । करिब डेढ घण्टाको पैदल यात्राका क्रममा विद्यार्थीहरूले चुरेको हरियाली, चराचुरुंगीको आवाज र प्राकृतिक सौन्दर्यको प्रत्यक्ष अनुभव गरे । राजारानी तालमा पानीभित्र उम्रिएका सिमालीका रूख र त्यसमा झुन्डिएका ४६ प्रजातिका सुनाखरी (अर्किड) ले विद्यार्थीहरूलाई मन्त्रमुग्ध बनाएको थियो ।

Advertisement

भ्रमणका क्रममा विद्यार्थीहरूले प्रकृतिका साथै इतिहास र संस्कृतिको पनि नजिकबाट साक्षात्कार गरे । राजारानी सामुदायिक वनका अध्यक्ष सुजन मगरले यस क्षेत्रलाई अजिंगरहरूको राजधानी र धिमाल समुदायको उद्गमस्थलका रूपमा चिनाउँदै यसको ऐतिहासिक महत्वबारे जानकारी गराए । विद्यार्थी निश्चल न्यौपानेले यस यात्रालाई ‘खुला विश्वविद्यालय’ को संज्ञा दिँदै पुस्तकमा पढेका कुराहरूलाई प्रत्यक्ष देख्न पाउँदा उत्साह थपिएको बताए ।

यस भ्रमणको अर्काे मुख्य आकर्षण लेटाङ नगरपालिकाद्वारा निर्मित ‘अन्तरधार्मिक पार्क’ बन्यो । हिन्दु, बौद्ध, किराँत, इस्लाम र इसाई धर्मबीच सद्भाव र सहअस्तित्वको सन्देश दिने यो पार्कले नेपाली समाजको ‘विविधतामा एकता’ को तस्विर झल्काएको थियो । लेटाङ नगरपालिकाका प्रमुख भूपेन्द्र लावती र उपप्रमुख कृष्णकुमारी निरौलाले विद्यार्थीहरूलाई स्वागत गर्दै राजारानी क्षेत्र साइबेरियन चराहरूको विश्रामस्थल र जैविक अनुसन्धानको केन्द्र बन्दै गएको जानकारी दिए । 

विद्यालयका प्रिन्सिपल टीकाराम पुरीले एभरेष्ट स्कुलले सिकाइलाई कक्षा कोठाको चार पर्खालभित्र मात्र सीमित नराखी व्यवहारिक ज्ञानसँग जोड्न यस्ता कार्यक्रम आयोजना गर्दै आएको बताए । शिक्षक ऋषभ पाण्डे र विद्यार्थी प्रदान ढकालका अनुसार यो यात्राले शिक्षक–विद्यार्थीको सम्बन्धलाई थप प्रगाढ बनाउनुका साथै सामाजिक सद्भाव र वातावरणीय संरक्षणको पाठ समेत सिकाएको छ ।

प्रकृतिसँगको संवाद, इतिहासको खोजी र एकताको सन्देश बोकेको यो हाइकिङ विद्यार्थीहरूका लागि ज्ञान र प्रेरणाको एउटा अमूल्य अवसर सावित भयो ।