झापाका विद्यालयमा सुरक्षा अभियान: सिसी क्यामेरा जडान सुरु

झापा । विद्यालय परिसरमा हुने लागूऔषध दुर्व्यसन र अवाञ्छित गतिविधि नियन्त्रण गर्न झापाको बाह्रदशी गाउँपालिकामा एक विशेष अभियान सुरु गरिएको छ।  ‘सामुदायिक विद्यालयलाई सुरक्षित र दुर्व्यसनमुक्त बनाउने’ दीर्घकालीन लक्ष्यका साथ विद्यालयहरूमा सिसी क्यामेरा जडान गर्न थालिएको हो।

अभियानको सुरुवात बाह्रदशी–२ स्थित भगवती आधारभूत विद्यालयबाट गरिएको छ। यो अभियानमा पूर्वविद्यार्थी र व्यवसायीहरूले सामाजिक उत्तरदायित्व वहन गरेका छन् । एभरेस्ट हाइपर मार्केटका सञ्चालक तथा पूर्वविद्यार्थी चान मोहम्मदले विद्यालयलाई चार वटा सिसी क्यामेरा सहयोग गरेसँगै अभियानको औपचारिक शुभारम्भ भएको हो ।
अभियानको उद्‌घाटन गर्दै जिल्ला प्रहरी कार्यालय झापाकी प्रहरी उपरीक्षक (एसपी) वशुन्धरा खड्काले विद्यालयमा जडान गरिएका सिसी क्यामेरालाई  ‘बिना बर्दीका प्रहरी’ को संज्ञा दिइन् । ‘प्रहरी हरसमय सबै ठाउँमा पुग्न सक्दैन, तर प्रविधिको यो निगरानीले अपराध हुनुअघि नै रोकथाम गर्न र दोषीलाई कानुनी दायरामा ल्याउन ठुलो मद्दत पुग्छ,’ उनले भनिन् ।

विद्यालयका प्रधानाध्यापक घनश्याम उप्रेतीका अनुसार विद्यालय समयभन्दा अघि र पछि बाहिरी व्यक्तिहरू विद्यालय छिरेर लागूऔषध सेवन गर्ने र भौतिक सम्पत्तिमा क्षति पुर्‍याउने क्रम बढेपछि यो कदम चालिएको हो । विद्यालयलाई सुरक्षित बनाउँदा विद्यार्थीमा अनुशासन र अभिभावकमा भरोसा बढ्ने विश्वास लिइएको छ ।

कार्यक्रमका अध्यक्ष एवं वडाध्यक्ष भीमबहादुर कार्कीले बाह्रदशी गाउँपालिकाभित्रका सबै १६ वटा सामुदायिक विद्यालयमा क्रमशः सिसी क्यामेरा जडान गरिने जानकारी दिए । अभियानलाई साथ दिँदै अर्का पूर्वविद्यार्थी एवं प्रधानाध्यापक थीरकुमार दाहालले थप एक थान आईपी क्यामेरा उपलब्ध गराउने घोषणा गरेका छन् ।
कार्यक्रममा इलाका प्रहरी कार्यालय राजगढका प्रमुख जबरबहादुर बस्नेत, समाजसेवी अमृतबहादुर बुढाथोकी लगायत स्थानीय जनप्रतिनिधि र शिक्षाप्रेमीहरूको उपस्थिति थियो । विद्यालयले अभियानमा सहयोग गर्ने दाताहरूलाई सम्मान समेत गरेको छ । यो अभियानले प्रहरी, विद्यालय र समुदायबीचको सहकार्यको उत्कृष्ट नमुना प्रस्तुत गरेको छ ।