विद्यालयमा गोली चल्दा ४ जनाको मृत्यु

एजेन्सी । अमेरिकाको ओरेगन राज्यस्थित एक प्राथमिक विद्यालयमा गोली चल्दा तीन बालबालिकासहित कम्तीमा चार जनाको मृत्यु भएको छ। घटनामा गोली चलाउने व्यक्ति पनि मारिएका छन् ।

सीबीएस र सीएनएनका अनुसार बिहीबार बेन्ड सहरस्थित सिल्भर रेल प्राथमिक विद्यालयमा गोली चलेको हो। बेन्ड सहर पोर्टल्यान्डबाट करिब १६० किलोमिटर दक्षिणपूर्वमा पर्छ ।

बेन्ड प्रहरी विभागकी सञ्चार व्यवस्थापक शीला मिलरका अनुसार स्थानीय समयअनुसार बिहीबार दिउँसो १२:५९ बजे विद्यालयबाहिर पार्क गरिएको एउटा कारमा गोली प्रहार भएको सूचना प्रहरीलाई प्राप्त भएको थियो । त्यसको केही मिनेटमै प्रहरी घटनास्थल पुगेको थियो ।

गोली चलाएको आरोप लागेका व्यक्ति केही समयपछि मृत फेला परेका थिए । उनलाई प्रहरी वा अन्य कसैले गोली हानेको हो भन्नेबारे स्पष्ट जानकारी नभएको मिलरले बताइन् । मृत्यु भएका चार जनाको प्रारम्भिक विवरणमा गोली चलाउने व्यक्ति समावेश छन् वा छैनन् भन्ने पनि स्पष्ट भइसकेको छैन । घटनामा घाइते हुनेको सङ्ख्या र उनीहरूको अवस्थाबारे तत्काल जानकारी सार्वजनिक गरिएको छैन ।

प्रहरीले विद्यालयका कोठा–कोठामा पुगेर त्यहाँ रहेका सबैलाई सुरक्षित रूपमा बाहिर निकाल्ने काम गरेको मिलरले बताइन्। उनले घटनालाई अत्यन्तै दुःखद भन्दै बेन्डमा यस्तो घटना फेरि नहोस् भन्ने आफूहरूको चाहना रहेको बताइन् ।

अमेरिकाको संघीय अनुसन्धान ब्युरो (एफबीआई) का निर्देशक काश पटेलले सामाजिक सञ्जालमार्फत घटनाको अनुसन्धानमा स्थानीय प्रहरीलाई सहयोग गरिरहेको जानकारी दिएका छन् । उनले आवश्यक सबै स्रोतसाधन उपलब्ध गराउने बताएका छन् । ओरेगनकी गभर्नर टीना कोटेकले घटनाक्रमलाई नजिकबाट निगरानी गरिरहेको बताएकी छन् ।