भारत भ्रमणको तयारीमा प्रधानमन्त्री

प्रधानमन्त्री वालेन्द्र शाहको भारतको औपचारिक भ्रमणका लागि प्रारम्भिक तयारी सुरु भएको छ। भ्रमणको मिति तय भइनसके पनि नेपाल र भारतका सम्बन्धित निकायले भ्रमणको कार्यसूची र छलफलका विषय टुङ्ग्याउने काम अघि बढाएका छन्। परराष्ट्र मन्त्रालयका अनुसार दुवै देशको आपसी सहमतिमा भ्रमणको मिति निर्धारण गरिनेछ।

भारतीय सञ्चारमाध्यमका अनुसार मङ्सिरको पहिलो वा दोस्रो सातामा भ्रमण हुन सक्ने सम्भावना छ। गत चैतमा नयाँ सरकार गठन भएपछि भारतीय प्रधानमन्त्री नरेन्द्र मोदीले शाहलाई भारत भ्रमणको निम्तो पठाएका थिए। त्यसयता दुई देशबीचको सम्बन्ध र सहकार्यका विषयमा छलफल हुँदै आएको छ।

परराष्ट्र मन्त्रालयले भ्रमणको प्रारम्भिक कार्यसूची तयार पार्न आन्तरिक तयारी गरिरहेको जनाएको छ। मन्त्रालयका प्रवक्ता लोकबहादुर क्षेत्रीका अनुसार दुवै देशलाई अनुकूल हुने समयमा भ्रमणको मिति तय गर्ने सहमति भएको छ। नयाँ सरकार गठनपछि हुन लागेको प्रधानमन्त्रीको पहिलो औपचारिक विदेश भ्रमण भएकाले राष्ट्रिय हित र द्विपक्षीय सहकार्यका विषयलाई प्राथमिकतामा राखिनेछ।

नेपाल र भारतबीचको सम्बन्धलाई थप व्यवस्थित बनाउन भ्रमणमा विभिन्न विषयमा छलफल हुने अपेक्षा गरिएको छ। भदौ १० गते भोटेकोशी क्षेत्रमा आएको हिमबाढीपछि विपत् व्यवस्थापन र पुनर्निर्माणमा सहकार्यको आवश्यकता पनि बढेको छ। प्रधानमन्त्री शाहले संयुक्त राष्ट्रसङ्घको ८१औँ महासभामा सम्बोधन गर्दै नेपाल, भारत र चीनबीच त्रिदेशीय संयन्त्र स्थापना गरेर जलवायु परिवर्तनका असर न्यूनीकरण गर्न सहकार्य गर्ने प्रस्ताव गरेका थिए। उक्त प्रस्तावबारे पनि भारत भ्रमणका क्रममा छलफल हुने मन्त्रालयले जनाएको छ।

भ्रमणका क्रममा प्रधानमन्त्री शाह र भारतीय प्रधानमन्त्री मोदीबीच उच्चस्तरीय भेटवार्ता हुनेछ। दुवै देशका प्रतिनिधिमण्डलबीच विपत् व्यवस्थापन, पूर्वसूचना प्रणाली, विकास निर्माण, आर्थिक साझेदारी, ऊर्जा सहकार्य र सीमा व्यवस्थापनलगायत विषयमा छलफल हुने अपेक्षा गरिएको छ।

यसका अतिरिक्त नेपाली चियाको निर्यात सहज बनाउने, रासायनिक मलको आयातका लागि थप व्यवस्था गर्ने, पेट्रोलियम पाइपलाइन विस्तार गर्ने, पर्यटन प्रवर्द्धनमा सहकार्य बढाउने तथा थप एकीकृत जाँचचौकी स्थापना गर्ने विषय पनि कार्यसूचीमा समेटिन सक्नेछन्। यी विषयमा समझदारी तथा केही सम्झौता हुन सक्ने मन्त्रालयको अनुमान छ।

दुई देशका परामर्श संयन्त्र र विभिन्न कार्यदलले पहिचान गरेका समस्या समाधानका विषयमा पनि उच्चस्तरीय वार्ता केन्द्रित हुने जनाइएको छ। भोटेकोशी हिमबाढीबाट प्रभावित क्षेत्रको पुनर्निर्माणका लागि नेपालले भारतसँग सहयोग माग्ने तयारी गरेको छ। भारतले यसअघि पुनर्निर्माणमा सहयोग गर्ने प्रतिबद्धता जनाएको सन्दर्भमा भ्रमणका क्रममा सहयोगसम्बन्धी थप घोषणा हुन सक्ने अपेक्षा गरिएको छ।