अर्किड कलेजमा विद्यार्थी सम्मान:  विश्वकप पदक विजेतासहित १ सय विद्यार्थी पुरस्कृत

विराटनगर । विराटनगरस्थित अर्किड कलेजले शैक्षिक तथा अतिरिक्त क्रियाकलापमा उत्कृष्ट प्रदर्शन गर्ने आफ्ना एक सयभन्दा बढी विद्यार्थीलाई एक समारोहका बीच नगदसहित सम्मान गरेको छ ।

कलेज परिसरमा आयोजित ‘विद्यार्थी सम्मान तथा पुरस्कार वितरण कार्यक्रम’ मा कक्षा ११ र १२ को आन्तरिक परीक्षामा उत्कृष्ट अंक ल्याउनेदेखि अन्तर्राष्ट्रिय स्तरसम्म पदक जित्न सफल खेलाडीलाई पुरस्कृत गरिएको हो । कलेजले आन्तरिक तथा बाह्य खेलकुद, वक्तृत्वकला, हाजिरीजबाफ, म्याराथन लगायतका विधामा प्रथम, द्वितीय र तृतीय हुने विद्यार्थीलाई सम्मान गरेको छ ।

Advertisement

कार्यक्रममा भारतमा आयोजित ‘सुटिङ बल वर्ल्ड कप २०२६’ मा दोस्रो हुँदै रजत पदक विजेता खेलाडी दीपिका माझी र कांस्य पदक जितेकी सुस्मिता कामतलाई विशेष सम्मान प्रदान गरिएको थियो ।

त्यसैगरी, हिसान स्पोर्ट्स मिट अन्तर्गत २ सय मिटर दौडमा प्रथम निरुता राजवंशी र १ सय मिटरमा प्रथम शर्मिला मोक्तानलाई पनि पुरस्कृत गरियो । महिला फुटबलतर्फ उपविजेता बनेको टोलीलाई समेत कलेजले सम्मान गरेको छ ।

कलेजको आन्तरिक परीक्षामा उत्कृष्ट नतिजा ल्याउने कक्षा ११ र १२ का विद्यार्थी प्रशान्त धामी, प्रतीक काफ्ले, उपेश सदाय, उदयकुमार सोनार, दीपकुमार दास, समिर घिमिरे, तेजिना चौधरी, पिंकीकुमारी महतो, शंकर चौहान, परिणाम बुढाथोकी, अशोककुमार मण्डल र हस्तबहादुर बुढा क्षेत्रीलाई नगदसहित सम्मान गरिएको प्रिन्सिपल मनिष भट्टराईले जानकारी दिए ।

विद्यार्थीहरूलाई कलेजका अध्यक्ष अमित ढकाल, प्रिन्सिपल भट्टराई, निर्देशकहरू दीपेश बास्तोला, राजन दत्त, गजेन्द्र पण्डित, दुर्जेय थापालगायतले पुरस्कार तथा प्रशंसा पत्र प्रदान गरे ।

विज्ञान, व्यवस्थापन र होटेल व्यवस्थापन संकायमा गरी १ हजार ५ सय बढी विद्यार्थी अध्ययनरत रहेको यस कलेजले विद्यार्थीको प्रतिभालाई उजागर गर्न वार्षिक रूपमा यस्ता कार्यक्रम गर्दै आएको छ ।

कार्यक्रममा बोल्दै कलेजका निर्देशक बास्तोलाले भने, ‘अतिरिक्त क्रियाकलाप र शैक्षिक परीक्षामा उत्कृष्ट हुने विद्यार्थीलाई सम्मान गर्दा उनीहरूको आत्मविश्वास बढ्छ नै, साथै अन्य विद्यार्थीलाई पनि आगामी दिनमा अझ राम्रो गर्ने प्रेरणा मिल्छ । विद्यार्थीलाई उत्प्रेरित गर्नु नै हाम्रो मुख्य उद्देश्य हो ।’