चीनमाथि अमेरिकी मतदाताको डाटा चोरेको गम्भीर आरोप

एजेन्सी । अमेरिकी राष्ट्रपति डोनाल्ड ट्रम्पले चीनमाथि अमेरिकी मतदाताको तथ्यांक चोरी गरेको गम्भीर आरोप लगाएका छन् ।

ह्वाइट हाउसबाट राष्ट्रलाई सम्बोधन गर्दै ट्रम्पले सन् २०२० को अमेरिकी राष्ट्रपति निर्वाचनका क्रममा चीनले करिब २२ करोड अमेरिकी मतदाताको डाटा गैरकानुनी रूपमा चोरेको दाबी गरेका हुन् । उनले यससँग सम्बन्धित गुप्तचर निकायका कागजातहरू आफ्नो प्रशासनले छिट्टै सार्वजनिक गर्ने पनि बताएका छन् ।

Advertisement

ट्रम्पका अनुसार चीनले अमेरिकी निर्वाचन प्रणालीका कमजोरीहरूको फाइदा उठाउँदै मतदाताको विवरण प्राप्त गरेको थियो । उनले यो योजना सन् २०२० को निर्वाचनकै समयमा सुरु भएको दाबी गरे ।

उनले अमेरिकी केन्द्रीय गुप्तचर संस्था (सीआईए), संघीय अनुसन्धान ब्यूरो (एफबीआई) तथा केही सरकारी अधिकारीहरूले चीनको कथित चुनावी हस्तक्षेपसम्बन्धी जानकारी लुकाएको आरोपसमेत लगाए ।

ट्रम्पले अमेरिकी मतदान मेसिन, मतदाताको तथ्यांक तथा मतगणना प्रणाली साइबर आक्रमणको जोखिममा रहेको उल्लेख गर्दै चीनसँगै रुस, इरान र उत्तर कोरियालाई पनि सम्भावित साइबर खतराका रूपमा औंल्याए ।

यद्यपि, ट्रम्पले लगाएका आरोपका बारेमा स्वतन्त्र रूपमा पुष्टि हुन बाँकी छ । चीनले पनि यस विषयमा तत्काल कुनै आधिकारिक प्रतिक्रिया दिएको छैन ।