सोनम वाङचुकद्वारा २६ दिनको आमरण अनशन अन्त्य

एजेन्सी । भारतका चर्चित सामाजिक अभियन्ता सोनम वाङचुकले २६ दिन लामो आमरण अनशन अन्त्य गरेका छन् । नीट परीक्षाको प्रश्नपत्र चुहावट प्रकरणमा नैतिक जिम्मेवारी लिँदै शिक्षामन्त्री धर्मेन्द्र प्रधानले राजीनामा दिनुपर्ने मागसहित उनी अनशनमा बसेका थिए ।

स्वास्थ्य अवस्था गम्भीर बन्दै गएपछि वाङचुकलाई उपचारका लागि गुरुग्रामस्थित मेदान्ता अस्पतालमा राखिएको थियो । शुक्रबार भारतका केन्द्रीय मन्त्री जेपी नड्डा र जितेन्द्र सिंह अस्पताल पुगेका थिए । नड्डाले जुस पिलाएपछि वाङचुकले आफ्नो आमरण अनशन अन्त्य गरेका हुन् ।

Advertisement

अनशन तोडेपछि वाङचुकले सामाजिक सञ्जालमार्फत ६५ जना सांसदले अनशन अन्त्य गर्न आग्रह गरेको बताएका छन् । उनीहरूबीच लामो छलफल भएको र केही सर्तमा सहमति बनेपछि देशमा थप तनाव एवं हिंसाको सम्भावनालाई ध्यानमा राख्दै अनशन अन्त्य गर्ने निर्णय गरेको उनले उल्लेख गरेका छन् ।

वाङचुकले कक्रोच जनता पार्टीको आन्दोलनसँग ऐक्यबद्धता जनाउँदै जुन २८ देखि अनिश्चितकालीन आमरण अनशन सुरु गरेका थिए । आन्दोलनको मुख्य उद्देश्य नीट परीक्षामा भएको प्रश्नपत्र चुहावट प्रकरणमा निष्पक्ष छानबिन, दोषीमाथि कडा कारबाही र शिक्षामन्त्री धर्मेन्द्र प्रधानको नैतिक जिम्मेवारी सुनिश्चित गराउनु रहेको बताइएको छ ।

अनशनका क्रममा उनको स्वास्थ्य लगातार कमजोर बन्दै गएको थियो । त्यसपछि जुलाई १८ मा उनलाई नयाँदिल्लीस्थित सफदरजङ अस्पतालमा भर्ना गरिएको थियो । थप उपचार आवश्यक परेपछि जुलाई २१ मा गुरुग्रामको मेदान्ता अस्पताल सारियो । जहाँ चिकित्सकहरूको निगरानीमा उनको उपचार भइरहेको छ ।

अनशन अन्त्य गरे पनि वाङचुकले उठाएका मागहरू भने कायम रहेको जनाएका छन् । उनले शिक्षा प्रणालीमा पारदर्शिता, परीक्षा प्रणालीमाथिको जनविश्वास पुनःस्थापना र जिम्मेवार निकायले नैतिक उत्तरदायित्व वहन गर्नुपर्ने आवश्यकता दोहोर्‍याएका छन् । भारतमा नीट परीक्षाको प्रश्नपत्र चुहावट प्रकरणलाई लिएर लामो समयदेखि राजनीतिक तथा सामाजिक बहस चलिरहेको छ ।