भोटेकोशी बाढीपीडितका लागि नमुना कलेजले छुट्यायो ५ लाख ५ हजार ५५ रुपैयाँ

इटहरी । भोटेकोशी नदीमा आएको बाढीबाट प्रभावित नागरिकको राहत तथा उद्धारका लागि इटहरीस्थित नमुना कलेजले ५ लाख ५ हजार ५५ रुपैयाँ सहयोग गर्ने भएको छ ।

कलेज सञ्चालक समितिको शुक्रबार बसेको बैठकले उक्त रकम प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको हो । कलेजका सञ्चालक समिति अध्यक्ष केशव खड्काका अनुसार घोषणा गरिएको रकम शनिबार नै कोषमा जम्मा गरिनेछ ।

Advertisement

राष्ट्रिय विपत्तिका बेला शैक्षिक संस्थाले पनि पीडित नागरिकको साथमा उभिनुपर्ने मान्यताअनुसार सहयोग गर्ने निर्णय गरिएको अध्यक्ष खड्काले बताए । ‘राष्ट्रिय विपत्तिको यो अवस्थामा कलेजको तर्फबाट सानो भए पनि योगदान होस् भन्ने उद्देश्यले सहयोग गर्ने निर्णय गरेका हौँ,’ उनले भने ।

शिक्षा संस्था पठनपाठनमा मात्र सीमित नभई समाजमा संकट आइपर्दा सामाजिक उत्तरदायित्व निर्वाह गर्न पनि सक्रिय हुनुपर्ने सन्देश दिन सहयोग गरिएको कलेजले जनाएको छ । कलेजका अनुसार कोशी प्रदेशको शिक्षा क्षेत्रबाट राष्ट्रिय विपत्तिका लागि संस्थागत रूपमा सहयोग गर्ने यो पहिलो पहल हो ।

भोटेकोशी नदीमा आएको विनाशकारी बाढीका कारण रसुवालगायतका क्षेत्रमा ठूलो जनधनको क्षति भएको छ । बाढीपछि कैयौँ नागरिक बेपत्ता भएका छन् भने प्रभावित क्षेत्रमा खोजी, उद्धार, राहत तथा पुनःस्थापनाको काम जारी छ ।

सरकारी तथा सुरक्षा निकायसँगै निजी क्षेत्र, शैक्षिक संस्था र विभिन्न संघसंस्थाले बाढी प्रभावितका लागि सहयोग गरिरहेका बेला नमुना कलेजले पनि राहत कोषमा आर्थिक सहयोग गर्ने निर्णय लिएको हो ।