बाढी प्रभावित बालबालिकाको पीडाप्रति संवेदनशील बन्न प्रधानमन्त्रीको आग्रह

काठमाडौं । प्रधानमन्त्री बालेन्द्र (बालेन) शाहले श्रीकृष्ण जन्माष्टमीका अवसरमा देशका बालबालिकालाई शुभकामना दिँदै रसुवा–भोटेकोशी बाढीबाट प्रभावित बालबालिकाको पीडाप्रति संवेदनशील बन्न आग्रह गरेका छन् ।

सामाजिक सञ्जालमार्फत सन्देश दिँदै प्रधानमन्त्री शाहले यसपालि अन्य बालबालिकाजस्तै राधा–कृष्णको भेषमा सजिएर रमाउने अवसर विपद् प्रभावित क्षेत्रका बालबालिकाले नपाएको बताएका छन् । उनीहरूका आँखाले आफ्ना बाबुआमा र आफन्त खोजिरहेको उल्लेख गर्दै उनले विपद्का कारण घर, बस्ती र खेल्ने चौरसमेत खण्डहर बनेको बताएका छन् ।

Advertisement

बाढीपछि गम्भीर घाइते, गर्भवती, सुत्केरी, अपाङ्गता भएका व्यक्ति र वृद्धवृद्धासँगै बालबालिकालाई उद्धारमा प्राथमिकता दिइएको र प्रभावितहरू अहिले होल्डिङ सेन्टरमा रहेको उनले बताएका छन् । सुरक्षित र सहज बसोबासको व्यवस्था गरी बालबालिकाले पुनः आफ्ना भविष्यका सपना बुन्ने वातावरण बनाउने उनको भनाइ छ ।

प्रधानमन्त्री शाहले जलवायु परिवर्तनको असर हिमाली क्षेत्रमा बढ्दै गएकाले विपद्को जोखिम घटाउन पूर्वतयारी आवश्यक रहेको बताएका छन् । उनले बालबालिकालाई घरमा ‘विपद् झोला’ तयार राख्न, सानो भए पनि बचत गर्न तथा जलवायु परिवर्तन र विपद्का विषयमा अध्ययन र छलफल गर्न आग्रह गरेका छन् ।

उनका अनुसार केही बेर अघिसम्म १३ हजार ९५ जना प्रभावितको उद्धार भइसकेको छ । उद्धारमा खटिएका नेपाली सेना, नेपाल प्रहरी, सशस्त्र प्रहरी बल नेपाल तथा अन्य विज्ञ टोलीलाई धन्यवाद दिँदै उनले विदेशमा रहेका नेपाली, मित्रराष्ट्र र विकास साझेदार संस्थाले गरेको सहयोगप्रति पनि आभार व्यक्त गरेका छन् ।

प्रधानमन्त्री शाहले विपद्को समयमा एकता, सद्भाव र भ्रातृत्वको भावना राखेर अघि बढ्नुपर्नेमा जोड दिएका छन् । ‘संघर्ष र विपद्को समयमा हार मानेर वा निराश भएर बस्ने होइन,’ उनले श्रीकृष्णको सन्देश स्मरण गर्दै भनेका छन्, ‘धैर्य, कर्तव्य र एकताका साथ अघि बढ्नुपर्छ। हामी रोकिँदैनौँ ।’

उनले सबै मिलेर विपद्को सामना गर्दै सुरक्षित र उज्यालो नेपालको निर्माणमा जुट्न आह्वान गरेका छन् ।