कोशी प्रदेशसभाको ३२ औँ बैठक असोज २२ गते

विराटनगर । कोशी प्रदेशसभाको नवौँ अधिवेशनअन्तर्गत ३२ औँ बैठक आगामी असोज २२ गते बिहीबार बस्ने भएको छ।

कोशी प्रदेशसभा सचिवालयले सूचना जारी गर्दै बैठक असोज २२ गते दिउँसो १ बजे कटहरीस्थित कोशी प्रदेशसभा भवनमा बस्ने जानकारी दिएको हो ।

यसअघि गत भदौ २२ गते अर्को सूचना जारी नभएसम्मका लागि प्रदेश सभा बैठक अनिश्चितकालका लागि स्थगित गरिएको थियो । लामो समयपछि बैठकको मिति तय भएसँगै प्रदेशसभाको कामकारबाही पुनः अघि बढ्ने भएको छ ।

प्रदेशसभा नियमावली, २०७४ को नियम ६ बमोजिम सभामुखको आदेशअनुसार बैठक आह्वान गरिएको प्रदेश सभा सचिव सुदर्शन खड्काद्वारा जारी सूचनामा उल्लेख छ ।