कांग्रेसको आगामी कार्यदिशामा गगनको दस्तावेज अनुमोदन

काठमाडौं । नेपाली कांग्रेसले आगामी चार वर्षका लागि पार्टी सञ्चालन र राजनीतिक दिशानिर्देश तय गर्ने आधारका रूपमा सभापति गगन थापाले तयार पारेको राजनीतिक प्रतिवेदनलाई अनुमोदन गरेको छ ।

खुलामञ्चमा बसेको केन्द्रीय समिति बैठकले थापाको राजनीतिक प्रतिवेदन सर्वसम्मत रूपमा पारित गरेको सहमहामन्त्री कर्णबहादुर बुढाले जानकारी दिए । केन्द्रीय समितिबाट पारित भएसँगै प्रतिवेदन अब कांग्रेसको बन्दसत्रमा छलफलका लागि प्रस्तुत हुने भएको छ ।

प्रतिवेदनमा कांग्रेसले विगतका राजनीतिक तथा सांगठनिक अभ्यासको समीक्षा गर्दै आगामी दिनमा पार्टीलाई अघि बढाउने नीति र प्राथमिकता समेटिएका छन् । निर्वाचनमा जानुअघि अन्य दलसँग गठबन्धन नगर्ने नीतिलाई समेत प्रतिवेदनले अघि सारेको छ ।

त्यसैगरी पार्टीको पुनर्संरचना, सरकारका कामकारबाहीमाथि निगरानी तथा खबरदारी, निजी क्षेत्रसँग सहकार्य र युवाको सहभागिता बढाउने विषयलाई पनि प्रतिवेदनमा प्राथमिकता दिइएको छ । कांग्रेसले अघि सारेको ‘समुन्नत नेपाल, सम्मानित नेपाली’को अवधारणालाई समेत आगामी कार्यदिशासँग जोडिएको छ ।

प्रतिवेदनमा राजनीतिक र वैचारिक विषयसँगै संगठन तथा आर्थिक पक्षमा पार्टीले लिनुपर्ने दिशाबारे पनि प्रस्ताव गरिएको छ । विगतका कमजोरीको आत्मसमीक्षामार्फत पार्टीलाई नयाँ ढंगले अघि बढाउने विषयलाई प्रतिवेदनले जोड दिएको छ ।

केन्द्रीय समिति बैठक भने खाना खानका लागि केही समय स्थगित गरिएको छ । सहमहामन्त्री बुढाका अनुसार खाना खाएपछि बैठक पुनः बस्नेछ ।