झापामा स्वदेशी फूलको बजार जोगाउन प्रशासन सक्रिय, अवैध आयात र प्लास्टिकका फूलमा प्रतिबन्ध

झापा । तिहार र छठलाई लक्षित गर्दै झापा प्रशासनले भारतीय फूलको अवैध आयात नियन्त्रण गर्न कडाइ थालेको छ । स्थानीय किसानले उत्पादन गरेका फूलले बजार नपाउने अवस्था अन्त्य गर्न प्रशासनले सुरक्षा निकायलाई परिचालन गर्दै अवैध आयात रोक्न निर्देशन दिएको हो ।

जिल्ला प्रशासन कार्यालय झापाले सार्वजनिक सूचना जारी गर्दै गैरकानुनी रूपमा आयात गरिएका फूल नियन्त्रणमा लिन र प्रचलित कानुनले निषेध गरेका प्लास्टिकका कृत्रिम फूलको बिक्री–वितरण तथा भण्डारण नगर्न सचेत गराएको छ । प्रमुख जिल्ला अधिकारी श्रवणकुमार पोखरेलले चाडपर्वका बेला भारतीय बजारबाट लुकिछिपी फूल भित्राउने प्रवृत्ति रोक्न प्रशासनले सक्रियता बढाएको बताए । उनका अनुसार जिल्लामै पर्याप्त फूल उत्पादन भइरहेकाले बाहिरबाट अवैध रूपमा फूल ल्याउनुपर्ने अवस्था छैन ।

‘हाम्रो जिल्लालाई पुग्ने फूल यहीँका व्यवसायीले उत्पादन गरिसक्नु भएको छ,’ पोखरेलले भने, ‘यसपालिको चाडबाडमा स्वदेशी सयपत्री र मखमली फूल प्रयोग गरेर स्थानीय किसानलाई प्रोत्साहन गर्न जिल्लावासीलाई आग्रह गर्दछु ।’

खुला सीमाका कारण विशेषगरी तिहार र छठमा भारतबाट ठूलो परिमाणमा फूल भित्रिने गरेको छ । यसले स्थानीय किसानको उत्पादन बिक्री नभई खेर जाने अवस्था सिर्जना गरेको भन्दै झापाका फूल उत्पादक किसानले आयात नियन्त्रणका लागि प्रशासनको ध्यानाकर्षण गराउँदै आएका थिए ।

यस वर्ष मेचीनगर, बिर्तामोड, दमक, शिवसताक्षी, कनकाई र बुद्धशान्तिलगायतका पालिकामा दर्जनौँ किसानले व्यावसायिक रूपमा सयपत्री फूल उत्पादन गरेका छन् । चाडपर्वमा हुने माग धान्न जिल्लाभित्रकै उत्पादन पर्याप्त हुने अनुमान गरिएको छ ।

मेचीनगर नगरपालिका–४ का फूल उत्पादक नीलकण्ठ तिवारीले प्रशासनको निर्णयले स्थानीय किसानको उत्पादनले बजार पाउने वातावरण बन्ने विश्वास व्यक्त गरे । अवैध आयात नियन्त्रण हुन सके किसानले आफ्नो लगानी र परिश्रमको उचित मूल्य पाउने उनको भनाइ छ ।

प्रशासनले कानुनले निषेध गरेका प्लास्टिकका फूल बिक्री गरेको, वितरण गरेको वा भण्डारण गरेको पाइएमा सम्बन्धित व्यक्तिमाथि कानुनबमोजिम कारबाही गर्ने चेतावनीसमेत दिएको छ । यस कदमले चाडपर्वको बजारमा स्वदेशी प्राकृतिक फूलको प्रयोग बढ्ने र स्थानीय कृषि उद्यमलाई प्रोत्साहन पुग्ने प्रशासनले जनाएको छ ।