कोशीका मुख्यमन्त्रीको नाममा ३५ लाखको हवाइ टिकट, कसको भागमा कति ?

विराटनगर । कोशी प्रदेशका मुख्यमन्त्री काठमाडौँ आउजाउ गर्दा पछिल्लो तीन वर्षमा प्रदेशको ढुकुटीबाट करिब ३५ लाख रुपैयाँ प्लेन टिकटमै खर्च भएको छ ।

कार्यालयको काम र व्यक्तीगत कामका लागि काठमाडौं आउजाउ गर्दा तीन वर्षमा ३४ लाख ९० हजार ९११ रुपैयाँको प्लेन टिकटमा खर्च भएको हो ।

Advertisement

कोशी प्रदेश मुख्यमन्त्री तथा मन्त्रीपरिषद्को कार्यालयका आर्थिक वर्ष २०७८/०७९ देखि २०८०/०८१ सम्म ६ जना मुख्यमन्त्रीले सो रकम खर्च गरेका हुन् ।

प्लेन टिकटमा धेरै खर्च गर्नेमा हिक्मतकुमार कार्की अगाडि छन् । पछिल्लो दुई वर्षमा तेस्रो पटक मुख्यमन्त्री बनेका कार्की र उनको सचिवालयका लागि प्लेन टिकटमा मात्रै १० लाख ९३ हजार ३३५ रुपैयाँ राज्यकोषबाट खर्च भएको छ ।

कार्की दोस्रो प्रदेश तथा प्रतिनिधिसभा निर्वाचनपछि २०७९ पुस २५ गते नेकपा माओवादी केन्द्रको समर्थनमा मुख्यमन्त्री बनेका थिए । त्यसपछि २०८० भदौ २२ गतेदेखि असोज २७ गतेसम्म संविधानको धारा १६८ को उपधारा ३ अनुसार ठूलो दलको नेताको रुपमा मुख्यमन्त्री बनेका थिए । गत २०८१ बैशाख २७ गतेयता तेस्रो कार्यकालमा छन् ।

हिक्मतपछि धेरै खर्च गर्नेमा पूर्व मुख्यमन्त्री केदार कार्की छन् । ६ महिना मात्रै प्रदेशको मुख्यमन्त्री बनेका केदार कार्कीले १० लाख ४८ हजार २६० रुपैयाँ हवाई टिकटमा खर्च गरेका छन् । केदार कार्की २०८० असोज २८ गतेदेखि २०८१ बैशाख २७ गतेसम्म कोशी प्रदेशको मुख्यमन्त्री बनेका थिए ।

मुख्यमन्त्री तथा मन्त्रीपरिषद्को कार्यालयका अनुसार केदार कार्की र हिक्मतकुमार कार्कीले मात्रै गत असारसम्म प्लेन टिकटका लागि २१ लाख ४१ हजार रुपैयाँ खर्च गरेका छन् ।

आर्थिक वर्ष २०७८/०७९ देखि २०८०/०८१ मा प्रदेशमा शेरधन राई, भीम आचार्य, राजेन्द्र राई, हिक्मतकुमार कार्की, उद्धव थापा र केदार कार्की मुख्यमन्त्री थिए ।

२०८० साउन १७ गतेदेखि एक महिना मुख्यमन्त्री बनेका उद्धव थापाले पनि प्लेन टिकटमा ८८ हजार ३० रुपैयाँ खर्च गरेका छन् ।

तत्कालिन मुख्यमन्त्री शेरधन राईले दुई महिनामा प्लेन टिकटमा मात्रै १ लाख ९५ हजार रुपैयाँ खर्च गरेका थिए । २०७४ फागुन २ गते मुख्यमन्त्री नियुक्त भएका राई २०७८ भदौ १० गतेसम्म मात्रै मुख्यमन्त्री भए । आर्थिक वर्ष ०७८–७९ को दुई महिनामा मात्रै उनी र उनको सचिवालयले प्लेन टिकटका लागि राज्यकोषको १ लाख ९५ हजार रुपैयाँ खर्च गरेको थियो ।

उनीपछि मुख्यमन्त्री बनेका भीमप्रसाद आचार्यले १ लाख ४५ हजार प्लेन टिकटका लागि मात्रै खर्च गरे । भीम आचार्य २०७८ भदौ १० गतेदेखि २०७८ कै कात्तिक १६ गतेसम्म मुख्यमन्त्री बनेका थिए ।

भीम आचार्यपछि मुख्यमन्त्री बनेका राजेन्द्र राई र उनको सचिवालयले प्लेन टिकटका लागि मात्रै राज्यकोषबाट ९ लाख १९ हजार ७५६ रुपैयाँ खर्च गरे । राई २०७८ कात्तिक १६ गतेदेखि २०७९ पुस २५ गतेसम्म मुख्यमन्त्रीको जिम्मेवारीमा थिए ।

पछिल्लो तीन वर्षको अवधिमा मुख्यमन्त्रीसहित मुख्यमन्त्रीको सचिवालयले काठमाडौं आउजाउ गर्दा भत्ता र प्लेन टिकटका लागि मात्रै जम्मा ५५ लाख ७९ हजार ५७५ रुपैयाँ खर्च गरेको मुख्यमन्त्री कार्यालयको खर्च विवरणमा उल्लेख छ । कार्यालयका अनुसार मुख्यमन्त्री र सचिवालयको भत्तामा मात्रै २० लाख ८८ हजार ६६४ रुपैयाँ खर्च भएको छ । मुख्यमन्त्री हिक्मतकुमार कार्कीले भने काठमाडौं आउजाउ गर्दा भ्रमण भत्ता नलिने उनको सचिवालयले जनाएको छ ।