सर्वोच्च बारको अध्यक्षमा लोकतान्त्रिक समूहका पोखरेल विजयी

काठमाडौं । सर्वोच्च अदालत बार एसोसिएसनको अध्यक्षमा लोकतान्त्रिक समूहका मेघराज पोखरेल विजयी भएका छन् ।

वरिष्ठ अधिवक्ता पोखरेल नयाँ नेतृत्व चयनका लागि शनिबार भएको निर्वाचनबाट ३ सय ६८ मतसहित अध्यक्षमा निर्वाचित भएका हुन् । उनका निकटतम प्रतिस्पर्धी महेशकुमार थापाले १ सय ८१ मत ल्याउँदा अध्यक्षका अर्का प्रतिस्पर्धी प्रेमसिंह धामी १५ मतमा सीमित भए ।

अम्बरबहादुर राउत ३ सय ४६ मतसहित उपाध्यक्षमा निर्वाचित हुँदा प्रतिस्पर्धी भिष्मराज कडरियाले १ सय ७३ र अर्का उम्मेदवार वरिष्ठ अधिवक्ता उत्तमबहादुर श्रेष्ठले २५ मत पाएका छन् ।

रमणकुमार कर्ण ३ सय ३९ मत पाएर सचिव निर्वाचित भए । प्रतिस्पर्धी प्रभाकर श्रेष्ठले २ सय ५ मत पाए । ३ सय ३७ मतसहित पुन्देवी महर्जन सहसचिव निर्वाचित हुँदा प्रतिस्पर्धी श्रुतिकुमारी रेग्मीले २ सय १६ मत ल्याइन् ।

रामचन्द्र पौडेल ३ सय ४० मतसहित कोषाध्यक्षमा विजयी हुँदा प्रतिस्पर्धी अनन्तराज लुइँटेलले २ सय ७ मत पाएका छन् । शशि बस्नेत ३ सय १७ मत ल्याएर महिला सदस्यमा निर्वाचित भइन् । प्रतिस्पर्धी सुधा धितालले २ सय ८ मत पाइन् ।

सदस्यहरूमा दुर्गामोहन श्रेष्ठ, इन्द्रशेखर खड्का, प्रदीपकुमार श्रेष्ठ, नागेश्वरप्रसाद चौधरी, निर्मलकुमार उपाध्याय, ओमकृष्ण श्रेष्ठ, प्रदीपकुमार राजवंशी र सतिशराज मैनाली विजयी भएका छन् ।

निर्वाचित भएकामध्ये मैनाली प्रगतिशील समूहका हुन् । उनीबाहेक अरु लोकतान्त्रिक समूहका छन् ।