विराट गोल्डकपको सेमिफाइनलमा नेपाल पुलिस 

विराटनगर । विराटनगरमा जारी ३८ औँ विराट गोल्डकप फुटबल प्रतियोगिताको सेमिफाइनलमा विभागीय टोली नेपाल पुलिस क्लब पुगेको छ ।

विराट ट्रष्टले आयोजना गरेको प्रतियोगिताअन्तर्गत सोमबार भएको खेलमा पुलिसले मछिन्द्र फुटबल क्लबलाई सडेन डेथमा हराउँदै सेमिफाइनल यात्रा पक्का गरेको हो । दुवै टोलीले यसअघि भएका गोल्डकपको उपाधि जितेका छन् ।
पुलिसले जित निकाल्न धेरै संघर्ष गर्नु पर्‍यो । निर्धातिर ९० मिनेटमा पुलिसले मछिन्द्रभन्दा धेरै राम्रो गोलको अवसर पाए पनि सदुपयोग गर्न नसक्दा जित निकाल्न सडेन डेथको सहारा लिन बाध्य भयो ।

Advertisement

निर्धारित ९० मिनेट र थप गरिएको ३० मिनेटको अतिरिक्त समयमा १–१ गोलको बराबरी भएपछि खेल टाइब्रेकरमा गएको थियो । टाइब्रेकरमा समेत दुवै टोलीबाट ५–५ गोलको बराबरी भएपछि खेल सडन डेथमा धकेलिएको थियो ।
सडन डेथमा पुलिसका सुजन मगरले गोल गर्दा मछिन्द्रका श्याम मुर्मुको प्रहारलाई पुलिसका गोलरक्षक शत्रुधन चौधरीले उत्कृष्ट बचाउ गरे । गोलरक्षक शत्रुधन खेलको ‘प्लेयर अफ द म्याच’ हुँदै नगद ११ हजार रुपैयाँ पुरस्कार प्राप्त गरे ।

टाइब्रेकरमा पुलिसका तर्फबाट राम वाजी, सञ्जीव लामा, भरत शाह, जोन विष्ट र गोलरक्षक शत्रुधन चौधरीले गोल गरे । मछिन्द्रका रोहित चन्द, दिवाकर चौधरी, रोमन भुजेल, विशाल भण्डारी र देवेन्द्र तामाङले गोल गरेका थिए ।

त्यसअघि खेलको २९ औं मिनेटमा धीरेन्द्र शाहको गोलबाट पुलिसले अग्रता लिएको थियो । ओसेन्द्र कटवालको पासलाई सदुपयोग गर्दै उनले टिमलाई अग्रता दिलाएका थिए । तर, पुलिसको त्यो खुसी धेरै समय टिक्न सकेन । खेलको ३४ औं मिनेटमा मछिन्द्रका सौरभ लिम्बूले डिबक्स भित्रबाट हेडमार्फत गोल गर्दै खेललाई १–१ को बराबरीमा ल्याए ।

पुलिसबाहेक अन्य विभागीय टोली त्रिभुवन आर्मी क्लब र एपीएफ क्लब प्रतियोगिताबाट बाहिरी सकेका छन् । प्रतियोगिताअन्तर्गत मंगलबार विराटनगरको सम्राट स्पोर्टिङ क्लब र भारत झारखण्डको बिर्सा मुण्डा स्पोर्टस एकेडेमीबीच हुने ट्रस्टका प्रवक्ता धनकुमार लामाले जानकारी दिए ।