गुणस्तरहीन भेटिएपछि ‘करेन्ट’ र ‘लाली’ चाउचाउ बजारबाट फिर्ता गर्न निर्देशन

काठमाडौं । नेपाल सरकारको खाद्य प्रविधि तथा गुण नियन्त्रण विभागले चर्चित ब्रान्ड ‘करेन्ट’ र ‘लाली’ चाउचाउका केही ब्याचहरू स्वास्थ्यका लागि हानिकारक पाइएको भन्दै बजारबाट तत्काल फिर्ता गर्न निर्देशन दिएको छ।

बजार अनुगमनका क्रममा संकलन गरिएका नमुनाहरूको प्रयोगशाला परीक्षण गर्दा ती चाउचाउमा प्रयोग गरिएको चिल्लो पदार्थ ‘फ्याट’ को गुणस्तर नेपाल सरकारले तोकेको अनिवार्य मापदण्ड अनुरूप नपाइएपछि विभागले यो कदम चालेको हो। विभागका अनुसार यशोदा फुड्स प्रालि रुपन्देहीद्वारा उत्पादित करेन्ट चाउचाउ र लाली चाउचाउ स्वास्थ्यका लागि हानिकारक पाइएको भन्दै बजारबाट तत्काल फिर्ता गर्न निर्देशन दिएको हो ।

Advertisement

विभागका अनुसार यी चाउचाउमा ‘एक्सट्राक्टेड फ्याटको एसिड भ्यालु’ सरकारले तोकेको सीमाभन्दा बढी पाइएको छ। एसिड भ्यालु बढी हुनुको अर्थ चाउचाउमा प्रयोग गरिएको तेल गुणस्तरहीन वा पुरानो हुनु हो, जसले उपभोक्ताको स्वास्थ्यमा नकारात्मक असर पार्न सक्छ।

खाद्य स्वच्छता तथा गुणस्तर ऐन, २०८१ को दफा ३८ (२) को प्रावधान बमोजिम विभागले उक्त ब्याचका सबै उत्पादनहरू बजारबाट तत्काल फिर्ता गर्न उत्पादकलाई आदेश दिएको छ। साथै, सोही ऐनको उपदफा (४) बमोजिम ती उत्पादनहरूको बिक्री वितरण नगर्न र नगराउन समेत महानिर्देशकको निर्देशनमा सार्वजनिक सूचना जारी गरिएको छ।

विभागले उपभोक्ताहरूलाई यी विशेष ब्याचका चाउचाउ खरिद नगर्न र बिक्रेताहरूलाई आफ्नो पसलमा रहेका मौज्दात तुरुन्त फिर्ता गर्न आग्रह गरेको छ। गुणस्तरहीन खाद्य सामग्री बिक्री वितरण गरी जनस्वास्थ्यमा खेलबाड गर्नेलाई प्रचलित कानुन बमोजिम थप कारबाही गरिने समेत विभागले चेतावनी दिएको छ।