पहिरोले विद्यालयमा क्षति

हुम्ला । हुम्लाको चङ्खेली गाउँपालिका–५ नेप्का गाउँमा मंगलबार राति परेको अविरल असिनापानीपछि खसेको पहिरोले डाँफे आधारभूत विद्यालयको भवनमा क्षति पुर्‍याएको छ ।

पहिरोसँगै विद्यालय भवन मात्र नभई स्थानीयका खेतबारी र गोठसमेत प्रभावित भएका छन् । स्थानीय छक्कबहादुर तामाङका अनुसार अचानक परेको असिनासहितको वर्षापछि पहिरो खसेको हो ।

Advertisement

पहिरोले विद्यालय भवनमा माटो र ढुंगा थुपार्दा संरचना क्षतिग्रस्त भएको छ । विद्यालय प्रयोग गर्न नसकिने अवस्थामा पुगेको बताइएको छ ।

पहिरोले चङ्खेली–५ का वडाध्यक्ष हर्कधन तामाङ र स्थानीय धनसिंह तामाङका गोठ पनि पुरिएको छ । गोठमा रहेका भेडाबाख्रामा समेत क्षति पुगेको प्रारम्भिक जानकारी छ । यद्यपि, क्षतिको पूर्ण विवरण अझै संकलन भइरहेको छ ।

हुम्लाका प्रहरी प्रमुख डीएसपी शंकर खड्काका अनुसार प्रहरी टोली घटनास्थलतर्फ खटिएको छ । उनले क्षतिको यकिन विवरण संकलन भइरहेको बताए । भौगोलिक रूपमा विकट नेप्का गाउँ सदरमुकाम सिमकोटदेखि करिब पाँच घण्टा पैदल दूरीमा पर्छ ।