‘रोड टु युएफसी’को सेमिफाइनलमा पुग्ने पहिलो नेपाली बने रवीन्द्र

काठमाडौं । नेपाली मिक्स मार्सल आर्ट्स (एमएमए) का उदीयमान तारा रवीन्द्र ढाँटले विश्वको सबैभन्दा प्रतिष्ठित फाइटिङ मञ्च  ‘अल्टिमेट फाइटिङ च्याम्पियनसिप’ (युएफसी) को यात्रामा नयाँ इतिहास रचेका छन् ।

चीनको मकाउस्थित ग्यालेक्सी एरेनामा बिहीबार सम्पन्न  ‘रोड टु युएफसी’ सिजन–५ को क्वाटर फाइनल भिडन्तमा फिलिपिन्सका अनुभवी फाइटर किम्बर्ट अलिन्टोजोनलाई दोस्रो राउन्डमा पराजित गर्दै रवीन्द्र सेमिफाइनलमा प्रवेश गरेका हुन् ।

यो सफलतासँगै  ‘बझाङको बाघ’ उपनामले चिनिने २७ वर्षीय रवीन्द्र  ‘रोड टु युएफसी’ को सेमिफाइनल पुग्ने पहिलो नेपाली फाइटर बनेका छन् ।

ब्यान्टमवेट विधाको यस प्रतिस्पर्धामा रवीन्द्रले खेलको सुरुवातदेखि नै फिलिपिनी फाइटरमाथि कडा दबाब बनाएका थिए । हजारौँ नेपाली समर्थकहरूको  ‘हुटिङ’ र उत्साहका बीच उनले दोस्रो राउन्डमा विपक्षीलाई पाखा लगाउँदै आफ्नो व्यावसायिक एमएमए करियरको १० औँ जित दर्ता गरे । अन्तिम समयमा प्रतिद्वन्द्वी परिवर्तन भएर आएका किम्बर्टलाई रवीन्द्रको आक्रामक शैली र प्राविधिक सन्तुलनले निरुत्तर पारेको थियो ।

अब सेमिफाइनलमा रवीन्द्रले जापानका योनुसुके मिनामी र न्युजिल्यान्डका कासिब मुर्डोकबीच हुने खेलको विजेतासँग प्रतिस्पर्धा गर्नेछन् । यदि यस तौल समूहमा उनी च्याम्पियन बनेमा विश्वकै सबैभन्दा ठुलो एमएमए मञ्च  ‘युएफसी’ को मुख्य स्टेजमा खेल्ने आधिकारिक सम्झौता पाउने पहिलो नेपाली खेलाडी बन्ने छन् ।

रवीन्द्रको यो ऐतिहासिक सफलता जति लोभलाग्दो छ, त्यसपछाडिको संघर्ष उति नै मार्मिक र प्रेरणादायी छ । २०५५ साल मंसिर १५ गते बझाङको दुर्गम बित्थडचिर गाउँपालिकामा जन्मिएका रवीन्द्रको बाल्यकाल अभावै–अभावमा बितेको थियो ।

अत्यन्तै न्यून आर्थिक अवस्था र बिरामी बुवाको उपचारको जिम्मेवारी काँधमा आएपछि उनी कलिलै उमेरमा भारतमा श्रमिकको रूपमा काम गर्न बाध्य भएका थिए । परिवारले उनले कुनै प्राविधिक जागिर वा मजदुरी गरोस् भन्ने चाहेको थियो । एमएमए जस्तो जोखिमपूर्ण खेलमा भविष्य नदेख्ने परिवारको दबाबका कारण उनले लामो समयसम्म आफ्नो प्रशिक्षण र खेलप्रतिको लगावलाई गोप्य राखेरै अगाडि बढे ।

सन् २०१९ मा भारतमा भएको एमेच्योर राष्ट्रिय च्याम्पियनसिपमा स्वर्ण पदक जितेपछि मात्र रवीन्द्रको प्रतिभाले चर्चा पाउन थाल्यो । त्यसपछि उनले भारतको प्रसिद्ध  ‘मेट्रिक्स फाइट नाइट’ (एमएफएन) मा भारतीय फाइटरलाई नकआउट गर्दै च्याम्पियन बनेर आफ्नो क्षमता प्रमाणित गरे ।

सुरुमा खेलको विरोध गर्ने परिवार पनि उनको निरन्तरको सफलता र राष्ट्रप्रतिको योगदान देखेपछि अहिले उनको सबैभन्दा ठुलो समर्थक बनेको छ ।

मकाउको रिङमा इतिहास रच्दै गर्दा रवीन्द्रले यसको सम्पूर्ण श्रेय आफ्नो टिम र नेपाली समर्थकहरूलाई दिएका छन् । अभाव र पीडाको भुमरीबाट निस्किएर विश्व मञ्चमा नेपालको झन्डा फहराउने रवीन्द्र ढाँटको यो यात्रा नेपाली खेलकुद इतिहासकै एक स्वर्णिम अध्याय बन्न पुगेको छ ।