नयाँ समीकरणका लागि कांग्रेस-एमाले फकाउँदै नेकपा

काठमाडाैं । नेपाली कांग्रेसले नेकपा एमालेसँगकाे सहकार्य ताेड्ने बताएपछि प्रदेश सरकार गठनमा निर्णायक देखिएकाे नेपाली कम्युनिष्ट पार्टीले नयाँ सरकारका लागि दाैडधुप बढाएकाे छ । नेपाली कम्युनिष्ट पार्टी (नेकपा) ले नयाँ सत्ता सहकार्यका लागि दौडधुप तीव्र पारेका हुन् ।

नेकपाका प्रभावशाली नेताद्वय वर्षमान पुन र प्रमेश हमाल कांग्रेस र एमालेका शीर्ष नेताहरूसँग संवाद गरिरहेका छन् । शुक्रबार नेकपाका सहसंयोजक माधवकुमार नेपालले दुवै नेतालाई बोलाएर वर्तमान राजनीतिक गतिरोध अन्त्य र नयाँ सहकार्यका लागि संवाद गर्न विशेष निर्देशन दिएका थिए ।

Advertisement

माधव नेपालको निर्देशनपछि पुन र हमालले शुक्रबार नेकपा एमालेका अध्यक्ष केपी शर्मा ओलीसँग झण्डै डेढ घण्टा छलफल गरेका थिए । शनिबार नेपाली कांग्रेस सभापति गगन थापासँग छलफल गर्दैछन् ।

एमालेसँगको संवादको प्रगति र कांग्रेसको आगामी रणनीतिबारे बुझ्न उनीहरूले थापासँग छलफल गर्न लागेका हुन् ।

नेकपाभित्र अहिले कुन दलसँग सहकार्य गर्ने भन्नेमा दुई धार देखिएको छ । केही नेताहरू कांग्रेससँग मिलेर जानुपर्ने पक्षमा छन् भने अधिकांश नेता र कार्यकर्ताहरू एमालेसँग कार्यगत एकतासहित अघि बढ्नुपर्ने अडानमा छन् । आन्तरिक मतभेदका बीच दुई नेताले दुवै ठूला दललाई ‘फकाउने’ रणनीति अख्तियार गरेका हुन् ।