आपराधिक पृष्ठभूमिका अभिषेक गिरीविरुद्ध मुद्दा दायर, २१ करोडभन्दा बढीको बिगो दाबी

विराटनगर । आपराधिक पृष्ठभूमिका अभिषेक गिरीविरुद्ध २१ करोड ३२ लाख ७६ हजार ५ रुपैयाँ बिगो दाबी गर्दै जिल्ला अदालत काठमाडौंमा ठगी तथा आपराधिक विश्वासघातको मुद्दा दायर गरिएको छ ।

निर्माण व्यवसायी सुभाष श्रेष्ठले दिएको जाहेरीका आधारमा नेपाल प्रहरीको केन्द्रीय अनुसन्धान ब्यूरो (सीआईबी)ले अनुसन्धान पूरा गरेपछि सरकारी वकिल कार्यालयमार्फत अदालतमा अभियोगपत्र दर्ता गरिएको हो । गिरीलाई मोरङबाट पक्राउ गरी काठमाडौं लगेर अनुसन्धान गरिएको थियो ।

Advertisement

अनुसन्धानका क्रममा गिरीले धम्की, दबाब र आफ्नो प्रभाव प्रयोग गर्दै व्यवसायी श्रेष्ठको घरजग्गा, सवारीसाधन तथा अन्य सम्पत्तिमा कब्जा जमाएको आरोप लगाइएको छ । सीआईबीका अनुसार श्रेष्ठको स्काभेटर ३० लाख रुपैयाँमा कवाडीमा बिक्री गरिएको र टिपर ४० लाख रुपैयाँमा बेचेको भिडियो प्रमाणसमेत अनुसन्धान टोलीले फेला पारेको छ ।

अभियोगपत्रअनुसार श्रेष्ठ कन्स्ट्रक्सन प्रालिको नबिल बैंकको खाली चेक जबरजस्ती लिएर त्यसमा ५ करोड ४५ लाख ६० हजार ५०५ रुपैयाँ भरेर ठगीको प्रयास गरिएको थियो । यस्तै, हेटौंडास्थित जग्गाको बैना रकम १ करोड ३० लाख रुपैयाँ पनि गिरीले कब्जा गरेको आरोप छ ।

विश्वासघातका कारण नबिल बैंकले फोर्स लोनमार्फत १३ करोड ८७ लाख १५ हजार ५ सय रुपैयाँ असुल गरेको दाबी पनि अभियोगपत्रमा गरिएको छ । त्यसबाहेक बुढानीलकण्ठस्थित करिब ३ करोड ८७ लाख रुपैयाँ मूल्यको घरजग्गा, पानी ट्यांकर, टिपर, ग्रेडरसहितका निर्माण उपकरणसमेत गिरीले आफ्नो नियन्त्रणमा लिएको आरोप छ ।

श्रेष्ठले जिम्मा लिएको हुलाकी राजमार्गअन्तर्गत कटहरी खण्डको पेटी ठेक्का गिरीले लिएका थिए । तर, निर्धारित समयमा काम सम्पन्न नगरेपछि उक्त ठेक्का रद्द भएको जनाइएको छ ।

गिरी यसअघि अपहरण तथा शरीर बन्धक मुद्दामा ९ वर्ष कैद सजाय भोगेर २०७९ चैत ५ गते कारागारबाट रिहा भएका थिए । कारागारबाट छुटेपछि पनि उनले धम्की र प्रभावका आधारमा ठगी तथा आपराधिक विश्वासघातका गतिविधि जारी राखेको अनुसन्धानबाट खुलेको सीआईबीका प्रवक्ता अनुपम शमशेर जबराले बताए ।

अनुसन्धानका अनुसार गिरीले विभिन्न व्यक्तिसँग आफ्नो उच्च पहुँच रहेको दाबी गर्दै ठेक्का मिलाइदिने प्रलोभन देखाएर व्यवसायी श्रेष्ठलाई आर्थिक रूपमा ठगी गरेका थिए । मोरङ कारागारका कैदीबन्दीको भत्ता तथा श्रमबापतको रकम असुलेको आरोपमा गिरी असार १३ गते विराटनगर महानगरपालिका–८ स्थित निवासबाट पक्राउ परेका थिए ।

उक्त घटनासम्बन्धी अनुसन्धान भए पनि त्यस विषयको मुद्दा भने हालसम्म अदालतमा दर्ता भएको छैन । उच्च अदालत विराटनगरको आदेश अनुसार जिल्ला अदालत मोरङले छाड्न आदेश दिएपछि छुटेका गिरीलाई सीआईबीले नियन्त्रणमा लिँदै काठमाडौं लगेर अनुसन्धान गरेको थियो ।