एक जनाको हत्या, मन्दिर परिसरमा भेटियो शव

जनकपुरधाम । हत्या भएको अवस्थामा धनुषाको सबैला नगरपालिका–१२ रघुनाथपुर नहरचोकस्थित शिव–हनुमान मन्दिर परिसरमा एक जनाको शव फेला परेको छ । शुक्रबार बिहान घाँटी रेटिएको अवस्थामा शव फेला परेको हो ।

मृतक धनुषाको हंसपुर नगरपालिका–३ का अन्दाजी ४० वर्षीय बन्ठु राउत गडेरी रहेको प्रहरीले जनाएको छ । स्थानीयले बिहान मन्दिर परिसरमा उनलाई मृत अवस्थामा देखेपछि प्रहरीलाई खबर गरेका थिए ।

Advertisement

घटनास्थल रगत लतपतिएको अवस्था रहेको र आक्रमणबाट जोगिन प्रयास गरेको संकेतसमेत भेटिएको प्रहरीको भनाइ छ । प्रहरीका अनुसार घाँटी रेटेर हत्या गरिएजस्तो देखिन्छ ।

घटनाको जानकारी पाएलगत्तै प्रहरी टोली घटनास्थल पुगेर मुचुल्का उठाउने तथा प्रमाण संकलन गर्ने काम सुरु गरेको छ । घटनाको कारण खुल्न बाँकी रहेको र हत्यामा संलग्नको पहिचान भइनसकेको धनुषा प्रहरीका प्रवक्ता डीएसपी मधुसूधन न्यौपानेले बताए ।

उनका अनुसार हत्यामा संलग्नको खोजी तीव्र पारेर अनुसन्धान अघि बढाइएको छ । स्थानीयका अनुसार गडेरी केही दिनअघि मात्रै भारतको पञ्जाबबाट आएका थिए । दिनभर ज्याला मजदुरीको काम गरी राति मन्दिरमै बास बस्ने गरेको स्थानीयको भनाइ छ ।

यसअघि प्रकाशित समाचारमा अन्यथा भएकाले सच्याइएको छ । स.